Lufthansa ka njoftuar një paketë masash për uljen e kostove, teksa përballet me rritje të fortë të çmimeve të karburantit dhe presion nga mosmarrëveshjet me punonjësit.
Kompania ajrore gjermane planifikon të reduktojë kapacitetet e fluturimeve, të nxjerrë më herët nga përdorimi avionët e vjetër dhe të zhvendosë një pjesë më të madhe të flotës drejt njësisë me kosto më të ulët, Discover Airlines.
Sipas njoftimit, kostot e karburantit janë më shumë se dyfishuar krahasuar me periudhën para konfliktit me Iranin, duke rënduar ndjeshëm financat e kompanisë.
Si masë e menjëhershme, duke nisur nga 18 prilli, 27 avionë të Lufthansa CityLine do të hiqen përfundimisht nga programi i fluturimeve. Kompania thekson se avionët Canadair CRJ janë drejt fundit të jetës së tyre teknike dhe kanë kosto të larta operimi.
Në vijim, Lufthansa do të reduktojë flotën ndërkontinentale me gjashtë avionë në fund të sezonit veror. Katër avionët e tipit Airbus A340-600 do të dalin nga përdorimi në tetor, ndërsa dy Boeing 747-400 do të ndalojnë fluturimet për sezonin dimëror.
Gjatë dimrit 2026–2027, kompania do të ndërmarrë një tjetër hap duke ulur kapacitetet në fluturimet e shkurtra dhe të mesme, ekuivalente me pesë avionë.
Paralelisht, Lufthansa do të përshpejtojë transferimin e nëntë avionëve Airbus A350-900 drejt Discover Airlines, në kuadër të strategjisë afatmesme për optimizimin e flotës.
Drejtori financiar Till Streichert u shpreh se këto masa janë të pashmangshme për shkak të rritjes së ndjeshme të kostove të kerozinës dhe pasigurive gjeopolitike./skyweb.al
