Gjiganti mediatik Bloomberg i ka kushtuar një shkrim krahasues suksesit të turizmit në Shqipëri dhe vështirësive të Indisë për të tërhequr vizitorë ndërkombëtarë, duke evidentuar një fakt befasues: India regjistron më pak turistë të huaj se vendi ynë.
Megjithëse ka mbi 1.4 miliardë banorë, monumente të njohura botërisht dhe dhjetëra site të UNESCO-s, India priti vetëm 9.15 milionë turistë të huaj gjatë vitit 2025.
Në të njëjtën periudhë, Shqipëria regjistroi rreth 12.47 milionë hyrje të shtetasve të huaj, duke kaluar një prej vendeve më të mëdha dhe më të pasura me atraksione turistike në botë.
Të dhënat për Indinë bëhen edhe më problematike, pasi numri i turistëve të huaj ra me 8.1% krahasuar me vitin 2024 dhe mbeti rreth 16% poshtë nivelit të vitit 2019.
Bloomberg rendit mes problemeve kryesore të Indisë shqetësimet për sigurinë, mashtrimet ndaj turistëve, ndotjen, transportin e vështirë, procedurat e vizave dhe promovimin e dobët ndërkombëtar.
Shqipëria, nga ana tjetër, ka përfituar nga zgjerimi i fluturimeve me kosto të ulët, afërsia me tregjet evropiane, çmimet konkurruese dhe promovimi i fuqishëm në rrjetet sociale.
Territori i vogël u mundëson vizitorëve të kalojnë brenda pak orësh nga bregdeti te qytetet historike dhe zonat malore, duke e bërë vendin të përshtatshëm për udhëtime të shkurtra.
India po përjeton ndërkohë një bum të turizmit të brendshëm, me rreth 4.29 miliardë udhëtime gjatë vitit 2025. Përqendrimi te klientët vendas ka bërë që industria të mos u kushtojë të njëjtën vëmendje turistëve ndërkombëtarë.
Vendi arkëtoi rreth 32–35 miliardë dollarë nga turizmi ndërkombëtar, por edhe në këtë tregues mbetet pas destinacioneve më të vogla si Turqia, Tajlanda dhe Arabia Saudite.
Krahasimi nuk është plotësisht i barabartë, pasi Shqipëria numëron hyrjet kufitare të shtetasve të huaj, ku përfshihen edhe kalimet e përsëritura. Megjithatë, fakti që Bloomberg e vendos Shqipërinë përballë Indisë tregon përmasat e rritjes dhe jehonën ndërkombëtare që ka marrë turizmi shqiptar. /skyweb.al
