Daniela Amodei, bashkëthemeluese dhe presidente e Anthropic, konsiderohet sot një nga gratë më të fuqishme në botën e inteligjencës artificiale. Kompania që ajo drejton së bashku me vëllain e saj, Dario Amodei, ka krijuar Claude, një nga rivalët kryesorë të ChatGPT.
39-vjeçarja u rrit në San Francisko, në një familje pa lidhje të drejtpërdrejta me teknologjinë. Babai i saj ishte zejtar lëkure, ndërsa nëna punonte në bibliotekë. Ndryshe nga vëllai, i orientuar drejt matematikës, Daniela studioi letërsi angleze dhe shkenca politike.
Pas diplomimit punoi në programe ndërkombëtare zhvillimi, në projekte mjedisore në Ugandë dhe në një fushatë politike, përpara se t’i bashkohej kompanisë Stripe në vitin 2013. Pesë vite më vonë kaloi në OpenAI, ku mbajti postin e zëvendëspresidentes për sigurinë dhe politikat publike.
Në dhjetor të vitit 2020, Daniela, Dario dhe pesë kolegë të tjerë u larguan nga OpenAI për të themeluar Anthropic. Dario mori drejtimin e kërkimit dhe postin e drejtorit ekzekutiv, ndërsa Daniela u përqendrua te menaxhimi, punësimet, financimet, strategjia dhe qeverisja e kompanisë.
Anthropic është rritur nga rreth 200 në mbi 2 mijë punonjës. Në maj të vitit 2026, kompania siguroi një raund financimi prej 65 miliardë dollarësh, duke arritur një vlerësim prej 965 miliardë dollarësh. Ndërkohë, pasuria personale e Daniela Amodeit vlerësohet nga 7 deri në 15.5 miliardë dollarë.
Por pas suksesit financiar qëndron edhe një kontradiktë e madhe. Drejtuesit e Anthropic paralajmërojnë vazhdimisht për rreziqet e teknologjisë që vetë po zhvillojnë. Dario Amodei iu bashkua më shumë se 1,100 ekspertëve që kërkuan nga qeveria amerikane të ngadalësonte hedhjen në treg të modeleve më të avancuara, për të shmangur një përshpejtim të pakontrolluar.
Kritikët e konsiderojnë këtë qëndrim si “marketing përmes frikës”, por Daniela këmbëngul se një kompani e inteligjencës artificiale mund të jetë fitimprurëse pa fshehur rreziqet e produkteve të saj. Sfida e saj tani është të provojë se rritja marramendëse e Anthropic mund të vazhdojë pa e nxjerrë teknologjinë jashtë kontrollit njerëzor.
