Presidenti i Republikës, Bajram Begaj, ka reaguar pas protestave të dy ditëve të fundit në Tiranë, të shoqëruara me tensione dhe akte dhune, duke bërë thirrje për qetësi, përgjegjshmëri dhe dialog mes palëve.
Në një mesazh drejtuar qytetarëve këtë të enjte, kreu i shtetit thekson se kërkesat e protestuesve, veçanërisht të të rinjve, meritojnë të dëgjohen, por dhuna nuk mund të jetë zgjidhje.
“Zëri i çdo qytetari meriton të dëgjohet, veçanërisht zëri i të rinjve, të cilët përfaqësojnë shpresën dhe të ardhmen e vendit tonë. Këtë s’mund ta verë dhe nuk e vë askush në diskutim”, shprehet Begaj.
Presidenti dënon aktet e dhunës, duke paralajmëruar për pasojat që ato mund të kenë në sigurinë e qytetarëve dhe stabilitetin e vendit.
“Dhuna nuk është dhe nuk mund të jetë kurrë zgjidhja. Ajo dëmton shoqërinë, cenon sigurinë e qytetarëve dhe polarizon bashkëjetesën demokratike”, thekson ai.
Begaj u bën thirrje të gjitha palëve të tregojnë maturi dhe të mos lejojnë që tensionet të cenojnë rendin kushtetues.
“Në këto momente, vendi ynë ka nevojë për qetësi, përgjegjshmëri dhe dialog. Ka nevojë që dallimet të mos na përçajnë, por të na nxisin të dëgjojmë njëri-tjetrin dhe të gjejmë zgjidhje në interes të qytetarëve dhe të Shqipërisë”, vijon mesazhi.
Kreu i shtetit ka shprehur gjithashtu mbështetjen për forcat e rendit në ushtrimin e detyrës së tyre, ndërsa ka uruar shërim të shpejtë për të gjithë të lënduarit, si policë ashtu edhe protestues.
Në përfundim, Begaj shpreh gatishmërinë për të ofruar një hapësirë dialogu mes palëve të përfshira, në përputhje me kompetencat e tij kushtetuese.
“Me përgjegjësinë dhe tagrat që më jep Kushtetuta, mbetem i hapur për këdo që dëshiron të ketë një hapësirë dialogu dhe mirëkuptimi”, deklaron Presidenti, duke u kërkuar aktorëve të përfshirë t’i përkushtohen bashkëpunimit në interes të rinisë dhe Shqipërisë.
