Policia e Shtetit ka shprehur shqetësimin për pjesëmarrjen e të miturve në protestat e ditëve të fundit, duke ngritur dyshime se në disa raste fëmijët po përdoren në vijën e parë të përplasjeve për qëllime të caktuara.
Në një deklaratë publike, Policia thekson se të miturit janë ekspozuar ndaj dhunës, sendeve të forta, mjeteve piroteknike dhe gazit lotsjellës. Ajo u kërkon prindërve dhe kujdestarëve ligjorë të interesohen për vendndodhjen e fëmijëve dhe t’i mbajnë larg situatave të rrezikshme.
“Dijeni ku janë fëmijët tuaj! Mos lejoni që ata të ekspozohen ndaj dhunës dhe situatave që rrezikojnë jetën dhe shëndetin e tyre”, thuhet në apel.
Policia paralajmëron se çdo rast i dyshuar i nxitjes, organizimit apo shfrytëzimit të të miturve për veprime të kundërligjshme do të dokumentohet dhe do t’u referohet institucioneve kompetente.
“Përdorimi i fëmijëve si mburojë për akte dhune nuk është ushtrim i së drejtës për protestë. Është një veprim i papranueshëm që cenon sigurinë dhe të drejtat e tyre”, theksohet në deklaratë.
Institucioni shprehet se respekton të drejtën e protestës paqësore, përfshirë të drejtat e të miturve, dhe se do të marrë masa të nevojshme e proporcionale për mbrojtjen e tyre.
Në të njëjtën kohë, Policia u kërkon pjesëmarrësve në tubime të distancohen nga personat e maskuar dhe të dhunshëm, duke bërë thirrje për ndalimin e sulmeve ndaj efektivëve, institucioneve dhe pronës publike e private.
“Fëmijët nuk janë mburojë e askujt dhe nuk mund të kthehen në instrumente të përplasjeve për qëllime të caktuara. Asnjë kauzë nuk vlen më shumë se jeta dhe siguria e një fëmije”, përfundon apeli për mbrojtjen e të miturve. /skyweb.al
