Shitjet e makinave plotësisht elektrike kanë shënuar një moment historik në Evropë, duke tejkaluar për herë të parë ato të automjeteve me motor me djegie të brendshme gjatë muajit dhjetor. Të dhënat zyrtare të regjistrimeve tregojnë një ndryshim të qartë në sjelljen e konsumatorëve, në një periudhë kur tregu automobilistik europian po përjeton transformimin më të madh të dekadave të fundit sipas Reuters.
Sipas statistikave, regjistrimet e automjeteve elektrike me bateri kanë kaluar jo vetëm makinat me benzinë në Bashkimin Evropian, por edhe në tregun më të gjerë evropian që përfshin Britaninë e Madhe dhe vendet e Shoqatës Evropiane të Tregtisë së Lirë. Ky zhvillim vjen në një kohë kur shitjet totale të makinave në kontinent kanë shënuar muajin e gjashtë radhazi me rritje vjetore.
Rritja e fortë e makinave elektrike po ndodh paralelisht me debatet politike mbi të ardhmen e industrisë. Në dhjetor, Bashkimi Evropian prezantoi një plan për të rishikuar ndalimin efektiv të vitit 2035 për automjetet me motor me djegie të brendshme, pas presionit të vazhdueshëm nga prodhuesit europianë të makinave, të cilët po përballen me konkurrencë të fortë nga markat kineze, kosto të larta prodhimi dhe vështirësi në shitjen me fitim të automjeteve elektrike.
Në tregun evropian, prania e prodhuesve kinezë si BYD, Changan dhe Geely po rritet me ritme të shpejta, duke intensifikuar konkurrencën për markat tradicionale. Ndërkohë, prodhues si Volkswagen dhe BMW kanë nisur të përgjigjen me lançimin e modeleve të reja elektrike, më të përballueshme dhe të përshtatura për tregun masiv.
Të dhënat e dhjetorit tregojnë se regjistrimet e makinave elektrike me bateri u rritën ndjeshëm, ndërsa ato të makinave me motor klasik shënuan rënie. Në të njëjtën kohë, makinat hibride dhe hibride plug in vazhdojnë të zënë një peshë të konsiderueshme në treg, duke bërë që automjetet me energji elektrike në forma të ndryshme të përbëjnë mbi dy të tretat e regjistrimeve totale në Bashkimin Evropian.
Edhe pse disa prodhues europianë kanë shfaqur shqetësime për ritmin e tranzicionit, ekspertët vlerësojnë se trendi është i pakthyeshëm. Sipas tyre, pjesa e tregut të makinave elektrike do të vijojë të rritet, ndërsa shtetet po prezantojnë skema të reja nxitëse dhe industria po përshtatet me kërkesat e reja të konsumatorëve.
Në tërësi, viti 2025 është mbyllur me rritje të shitjeve të automjeteve në Evropë, duke arritur nivelet më të larta të pesë viteve të fundit, edhe pse ende nën shifrat para pandemisë. Megjithatë, tejkalimi i makinave me djegie të brendshme nga ato elektrike në dhjetor shihet si një pikë kthese që konfirmon drejtimin e ri të tregut automobilistik europian. /skyweb.al
