Prokuroria e Posaçme ka njoftuar sekuestrimin e një numri të madh pasurish në emër të shtetasit Ergys Agasi, në kuadër të hetimeve për pasuri të dyshuara si të përfituara në kundërshtim me ligjin.
Mes dyshimeve që po verifikohen është edhe kalimi i pronësisë së një resorti në periferi të Tiranës, i cili, sipas hetimit, mund të jetë marrë në mënyrë të paligjshme dhe regjistruar në favor të tij me ndihmë të ish-drejtueses së Kadastrës, Dallandyshe Bici.
Më herët, skyweb.al ka raportuar ekskluzivisht mbi këtë çështje, që në momentin kur Bici u paraqit në SPAK, duke ngritur pikëpyetje mbi mënyrën e trajtimit të pronave në zonën e Petrelës.
Në njoftimin zyrtar, SPAK bën të ditur se janë sekuestruar një sërë pasurish të llojit pyll, truall, ndërtesa, apartamente dhe garazhe, të shpërndara kryesisht në Tiranë, Petrelë, Lundër, Durrës dhe Vlorë.
Ndër pasuritë kryesore të sekuestruara përfshihen:
- Sipërfaqe pyjore prej 26,690.9 m² me ndërtesë 346.2 m² në Qeha Shytaj, Petrelë;
- Sipërfaqe pyjore 5,288.1 m² me ndërtesë 1 kat 182.2 m² (dy raste në të njëjtën zonë);
- Sipërfaqe pyjore 8,956 m² me ndërtesë 568 m²;
- Sipërfaqe pyjore 8,260.2 m² me ndërtim 2 kat 490.2 m²;
- Sipërfaqe pyjore 9316.1 m² me ndërtesë 2 kat 192.8 m²;
- Truall 406.34 m² me ndërtesë në Lundër;
- Tokë arë 10,300 m²;
- Truall 400 m² dhe ndërtesë 165 m² në Durrës;
- Apartamente dhe garazhe të shumta në Tiranë dhe Durrës;
- Truall dhe ndërtesë në Gjilek, Vlorë.
Përveç pasurive të paluajtshme, SPAK ka vendosur në sekuestro edhe:
- Një automjet Land Rover Defender 2023;
- Subjektin tregtar “E.A.S”;
- Llogari bankare në OTP Bank, Credins dhe BKT.
Hetimet po fokusohen te mënyra e përfitimit dhe regjistrimit të këtyre pasurive, ndërsa një pjesë e tyre dyshohet se janë legalizuar apo transferuar në kundërshtim me ligjin.
Rasti pritet të thellojë hetimet mbi praktikat e regjistrimit të pronave dhe rolin e zyrtarëve publikë në këto procese. /skyweb.al
