Të dhënat më të fundit të publikuara nga INSTAT tregojnë se lëvizja e pasagjerëve në transportin ajror ka vijuar të rritet edhe gjatë tremujorit të katërt, pavarësisht rënies sezonale pas muajve të verës.
Sipas statistikave, në këtë periudhë janë realizuar mijëra fluturime që kanë garantuar një fluks të qëndrueshëm udhëtimesh, edhe pse ritmi ka qenë më i moderuar krahasuar me kulmin turistik të tremujorit të tretë. Në total, gjatë vitit 2025 janë kryer rreth 70 mijë fluturime, me një rritje prej afro 2.2 për qind krahasuar me vitin pararendës.
Ky zhvillim ka reflektuar drejtpërdrejt në lëvizjen e pasagjerëve. Sipas përllogaritjeve, gjatë vitit të kaluar mesatarisht mbi 31 mijë pasagjerë në ditë kanë udhëtuar përmes transportit ajror, duke konfirmuar rolin gjithnjë e më të madh të avionit si mjet kryesor udhëtimi brenda dhe jashtë vendit.
Edhe në tremujorin e katërt, numri i pasagjerëve ka shënuar rritje të ndjeshme. Gjatë kësaj periudhe, përmes linjave ajrore kanë udhëtuar 2.611.748 pasagjerë, nga 2.385.329 që u regjistruan në të njëjtën periudhë të një viti më parë. Kjo përfaqëson një rritje prej 9.5 për qind, pavarësisht sezonit tradicionalisht më të qetë për udhëtimet ajrore.
Të dhënat e aeroportit tregojnë se viti 2025 është mbyllur me një rekord historik për trafikun e pasagjerëve. Në total, gjatë gjithë vitit janë regjistruar rreth 11.6 milion udhëtarë, shifra më e lartë e shënuar ndonjëherë në Shqipëri.
Rritja e vazhdueshme e numrit të pasagjerëve edhe jashtë sezonit veror tregon se udhëtimet ajrore po kthehen në një element të qëndrueshëm të lëvizjes së qytetarëve, të ndikuara si nga emigracioni, ashtu edhe nga turizmi dhe lidhjet gjithnjë e më të shpeshta me tregjet europiane. /skyweb.al
