Aeroporti Ndërkombëtar i Tiranës (TIA) njofton partneritetin e ri me kompaninë ajrore Finnair, e cila do të lidhë Helsinkin me Tiranën përmes një linje të re direkte. Fluturimet do të nisin zyrtarisht më 30 prill 2026 dhe do të operohen dy herë në javë, çdo të Enjte dhe të Diel, duke ofruar për herë të parë një lidhje të drejtpërdrejtë midis Shqipërisë dhe Finlandës.
Ky destinacion i ri shënon hyrjen zyrtare të Finnair në tregun shqiptar dhe përforcon rrjetin në zgjerim të linjave europiane të Aeroportit Ndërkombëtar të Tiranës. Linja pritet të ndikojë pozitivisht në turizëm dhe në bashkëpunimin ekonomik mes dy vendeve, duke ofruar një akses më të gjerë dhe lidhje të reja ndërkombëtare përmes qendrës së Finnair në Helsinki.
“Jemi të lumtur të prezantojmë Tiranën në rrjetin tonë, duke hapur mundësi të reja si për udhëtarët e pushimeve ashtu edhe për ata të biznesit,” – deklaron Adam Marciniec, Menaxher Rajonal CEE në Finnair. “Shqipëria është një treg krejtësisht i ri për Finnair, dhe ky lancim forcon praninë tonë në Ballkan. Linja e re u ofron udhëtarëve shqiptarë akses të përshtatshëm drejt qendrës sonë në Helsinki dhe më tej në rrjetin tonë në vendet nordike, baltike dhe Azi. Njëkohësisht, bën kulturën e gjallë dhe peizazhet mahnitëse të Shqipërisë më të aksesueshme për klientët tanë në Finlandë dhe më gjerë.”
Finnair është kompania ajrore kombëtare e Finlandës dhe një nga linjat më të vjetra të transportit ajror në botë që vazhdojnë të operojnë. Ajo njihet për besueshmërinë, cilësinë e shërbimit dhe rrjetin e gjerë që lidh Europën me Azinë dhe Amerikën e Veriut.
Aeroporti Ndërkombëtar i Tiranës vijon rritjen e qëndrueshme dhe angazhimin për zgjerimin e portofolit të partnerëve ajrorë, duke tërhequr linja prestigjioze ndërkombëtare dhe duke përmirësuar lidhjet ajrore për udhëtarët që udhëtojnë drejt dhe nga Shqipëria.
Shitjet e biletave për linjën Helsinki–Tiranë janë tashmë të hapura. Pasagjerët mund të rezervojnë fluturimet e tyre direkt në faqen zyrtare të Finnair ose përmes agjencive turistike.
Rreth Finnair
Finnair është një kompani ajrore me rrjet të gjerë, e specializuar në lidhjen e trafikut të pasagjerëve dhe mallrave midis Azisë, Amerikës së Veriut dhe Europës. Ajo është e vetmja linjë ajrore që operon fluturime direkte gjatë gjithë vitit drejt Laplandit. Klientët e kanë zgjedhur Finnair si “Kompania Ajrore më e Mirë në Europën e Veriut” në çmimet Skytrax për 15 vite radhazi. Finnair është anëtare e aleancës oneworld, ndërsa aksionet e Finnair Plc janë të listuara në Nasdaq Helsinki.
Rreth Aeroportit Ndërkombëtar të Tiranës (TIA)
Aeroporti Ndërkombëtar i Tiranës është porta kryesore e Shqipërisë drejt botës, duke lidhur vendin me një numër gjithnjë në rritje destinacionesh europiane. TIA vijon të zgjerojë rrjetin e tij dhe të përmirësojë shërbimet, teknologjinë dhe përvojën e përgjithshme të pasagjerëve. /skyweb.al
