Qeveria ka miratuar sot, më 6 shkurt, një vendim që prek pagat e një pjese të konsiderueshme të administratës publike. Këshilli i Ministrave ka dhënë dritën jeshile për një paketë vendimesh që parashikon indeksimin me 2.5% të pagave dhe të elementeve përbërëse të tyre për disa kategori të administratës publike për vitin 2026.
Sipas vendimit, indeksimi ka për qëllim ruajtjen e fuqisë blerëse të pagave dhe reflektimin e zhvillimeve ekonomike, duke garantuar një rritje të përgjithshme për funksione dhe struktura të caktuara shtetërore. “Në kuadër të indeksimit vjetor të pagave, miratohet rritja me 2.5% e pagave dhe e elementeve përbërëse të tyre për disa kategori të administratës publike”, thuhet në vendimin e Këshillit të Ministrave.
Kush përfiton nga rritja e pagave
Vendimet e miratuara përfshijnë një gamë të gjerë institucionesh dhe funksionesh. Konkretisht, nga indeksimi do të përfitojnë:
Presidenti i Republikës, përmes rritjes së pagës përkatëse;
Funksionet gjyqësore dhe të prokurorisë, për të cilat rritet paga referuese bazë;
Garda e Republikës;
Policia e Burgjeve;
Koordinatorët kundër korrupsionit;
Punonjësit mbështetës në administratë;
Specialitete të ndryshme të administratës publike;
Personeli i sistemit shëndetësor.
Sipas Këshillit të Ministrave, këto masa synojnë harmonizimin e strukturave të pagave dhe përmirësimin e kushteve financiare për kategori të ndryshme të punonjësve të shtetit.
/skyweb.al
