Ministria e Financave mblodhi në një tryezë të përbashkët përfaqësuesit kryesorë të sistemit financiar dhe të sektorit të bujqësisë për të analizuar ecurinë e Skemës së Garancisë Sovrane dhe Programit të Financimit për Biznesin Mikro, të Vogël dhe të Mesëm. Takimi u zhvillua me pjesëmarrjen e ministrit të Financave Petrit Malaj, guvernatorit të Bankës së Shqipërisë Gent Sejko, ministrit të Bujqësisë Andis Salla, drejtuesve të bankave tregtare dhe përfaqësuesve të Shoqatës Shqiptare të Bankave.
Diskutimi u përqendrua te niveli aktual i përdorimit të skemave, pengesat që po hasen në terren dhe mënyrat për të përmirësuar kalimin e kreditimit drejt ekonomisë reale. Autoritetet dhe bankat analizuan problematikat operative që ndikojnë në përthithjen e fondeve dhe në shpejtësinë e aprovimit të kredive, si dhe propozuan masa për ta bërë financimin më të aksesueshëm për fermerët dhe ndërmarrjet e vogla.
Ministri i Financave theksoi se bujqësia mbetet prioritet në politikat ekonomike të qeverisë, veçanërisht në prag të afrimit me tregun europian. Sipas tij, rritja e produktivitetit dhe e vlerës së shtuar në zinxhirin prodhues kërkon mbështetje financiare të strukturuar, ku Garancia Sovrane luan rol kyç për të ulur barrën e rrezikut për bankat dhe për të lehtësuar kreditimin e sektorit.
Nga ana e Bankës së Shqipërisë u vlerësua rëndësia e instrumentit si mjet plotësues për nxitjen e kreditimit, duke theksuar njëkohësisht domosdoshmërinë e ruajtjes së standardeve të kujdesshme të menaxhimit të rrezikut. Guvernatori nënvizoi se, megjithëse është shënuar progres, mbetet e nevojshme të përmirësohen disa elemente teknike për të rritur efektivitetin dhe përdorimin e plotë të skemës.
Ministri i Bujqësisë theksoi se interesi i fermerëve dhe bizneseve agropërpunuese është rritur muajt e fundit, duke treguar se sektori po e percepton më qartë mundësinë e financimit. Ai shtoi se institucionet në varësi do të intensifikojnë informimin dhe asistencën për aplikuesit, me synim rritjen e numrit të projekteve të suksesshme.
Përfaqësuesit e bankave raportuan një gjallërim të aplikimeve dhe konfirmuan se një pjesë e konsiderueshme kërkesash ndodhen aktualisht në proces vlerësimi. Ata sugjeruan disa rregullime për ta bërë mekanizmin më efikas dhe për të rritur përthithjen e fondeve, propozime që do të shqyrtohen në vijim nga autoritetet.
Skema e Garancisë Sovrane për bujqësinë është mbështetur me një fond prej 3 miliardë lekësh. Ajo parashikon mbulim deri në 70% të vlerës së kredisë, normë interesi të kufizuar në 2%, periudhë grace minimale 12 muaj dhe mundësi shlyerjeje të parakohshme pa penalitete.
Institucionet pjesëmarrëse riafirmuan angazhimin për bashkëpunim të vazhdueshëm me sektorin bankar dhe sipërmarrësit, me synimin për të rritur aksesin në financim, për të nxitur investimet dhe për të forcuar rolin e bujqësisë dhe të ndërmarrjeve mikro, të vogla dhe të mesme në zhvillimin ekonomik të vendit. /skyweb.al
