Dhjetëra projekte kullash në Tiranë u paraqitën si hotele luksoze, duke përfituar më shumë kate dhe lehtësi fiskale.
Por ngopja e tregut hotelier ngre pikëpyetje për fatin e tyre: A do të përfundojnë si zyra, apartamente apo godina gjysmë bosh?
Të dhënat e përpunuara nga “Monitor” tregojnë se tregu i hotelerisë në kryeqytet po jep sinjale maturimi, ndërsa prurjet e reja rrezikojnë të përballen me mungesë klientësh.
Në vitin 2025, shtatë hotelet më të mëdha në Tiranë realizuan së bashku rreth 6 miliardë lekë të ardhura, ose 39% të qarkullimit të 20 hoteleve më të mëdha në vend. Megjithatë, rritja e tregut po bëhet gjithnjë e më e vështirë.
Sipërmarrësi Behar Male, aksioner i “The Plaza Tirana”, deklaron se hoteleria në kryeqytet është tashmë një treg pothuajse i maturuar.
“Që të ardhurat të rriten, duhet të shtrenjtojmë çmimet, por nëse ndodh kjo, do të na largohen klientët”, shprehet ai.
Sipas tij, turistët që vizitojnë Tiranën kërkojnë kryesisht akomodim me çmime të ulëta, rreth 50–60 euro për dy persona, duke u orientuar gjithnjë e më shumë drejt apartamenteve “Airbnb”.
Në vitin 2025, në Tiranë ishin të listuara rreth 5,200 njësi në platformat e qiradhënies afatshkurtër. Ato gjeneruan rreth 31 milionë euro, sa gjysma e të ardhurave të shtatë hoteleve më të mëdha të kryeqytetit.
Çmimi mesatar i një nate në “Airbnb” në Tiranë ishte 42.4 euro, rreth tri herë më i ulët se tarifa e hoteleve me katër yje.
Edhe hotelet e kategorive të larta kanë çmime relativisht të ulëta krahasuar me kryeqytetet europiane. “Rogner” dhe “Xheko Imperial” ofrojnë dhoma për rreth 158 euro, “Mak Albania” për 126 euro dhe “Tirana International” për 119 euro.
Më të shtrenjtët mbeten “Tirana Marriott” dhe “Maritim Plaza”, me tarifa që luhaten rreth 180–200 euro nata. Në Athinë dhe Romë, ndërkohë, tarifa mesatare e të gjitha kategorive të hoteleve arrin në rreth 178–190 euro.
Këto të dhëna shtojnë dyshimet nëse tregu i Tiranës mund të përballojë dhomat e reja që pritet të shtohen nga projektet e shumta të kullave.
Sipas Behar Males, një pjesë e mirë e projekteve hoteliere u nxitën pikërisht nga përjashtimi prej taksës së ndikimit në infrastrukturë dhe nga mundësia për të ndërtuar më shumë kate.
Ai parashikon se disa prej këtyre godinave mund të mos funksionojnë kurrë si hotele, por të shndërrohen në zyra, apartamente ose njësi të tjera tregtare.
Kjo hap një tjetër çështje: çfarë do të ndodhë me lejet e ndërtimit të dhëna për struktura hoteliere, nëse përdorimi real i godinave ndryshon pas përfundimit të tyre?
Në ndryshim nga Tirana, potenciali më i madh për zhvillimin e hotelerisë mbetet në bregdet. Durrësi, Golemi dhe Gjiri i Lalëzit gjeneruan 42% të të ardhurave të hoteleve më të mëdha në vitin 2025.
Modeli i turizmit të organizuar, paketat “all inclusive”, kapacitetet e mëdha dhe marrëveshjet me operatorët ndërkombëtarë i japin kësaj zone avantazh ndaj kryeqytetit.
Megjithatë, edhe hoteleria bregdetare po goditet nga zhvlerësimi i euros, kostot e larta, konkurrenca e “Airbnb” dhe presioni për uljen e çmimeve.
Me një treg hotelier që po ngopet dhe mijëra apartamente që ofrohen me çmime shumë më të ulëta, bumi i kullave-hotel në Tiranë rrezikon të përfundojë në një transformim të heshtur të projekteve.
Pyetja tashmë nuk është vetëm nëse kullat do të ndërtohen, por se çfarë do të bëhen pasi të përfundojnë dhe nëse institucionet do të lejojnë ndryshimin e destinacionit për projektet që siguruan leje dhe lehtësi si hotele. /Marrë me shkurtime nga Monitor. Titulli është i redaksisë
