Qeveria e Mbretëria e Bashkuar ka reduktuar ndjeshëm numrin e vizave të punës të lëshuara për shtetasit e huaj, në kuadër të politikave të reja për shtrëngimin e rregullave të emigracionit dhe uljen e migracionit neto. Sipas të dhënave zyrtare, rënia e vizave është e konsiderueshme krahasuar me vitin e kaluar, duke reflektuar ndryshimet në kriteret e aplikimit dhe standardet më të larta të vendosura nga autoritetet britanike.
Masat e reja përfshijnë rritjen e pragut minimal të pagës për aplikantët, kërkesa më të forta për njohjen e gjuhës angleze, si dhe kontrolle më të rrepta për kompanitë që sponsorizojnë punëtorë nga jashtë. Autoritetet synojnë që përmes këtyre ndryshimeve të ulin varësinë nga fuqia punëtore e huaj dhe të nxisin punësimin e rezidentëve vendas.
Ulja e vizave ka prekur veçanërisht sektorët që tradicionalisht mbështeten në punëtorë ndërkombëtarë, përfshirë shëndetësinë dhe kujdesin social, ku raportohen shqetësime për mungesë stafi. Përfaqësues të bizneseve kanë paralajmëruar se kufizimet e reja mund të krijojnë vështirësi në plotësimin e vendeve të lira të punës, sidomos në profesionet me kërkesë të lartë.
Ndryshimet pritet të kenë ndikim edhe tek qytetarët e vendeve të Ballkanit që synojnë të punojnë ligjërisht në Britani, pasi procesi i aplikimit tashmë konsiderohet më selektiv dhe më i kushtueshëm. Qeveria britanike ka theksuar se prioritet mbetet kontrolli i kufijve dhe menaxhimi i qëndrueshëm i emigracionit, ndërsa politika e re do të vazhdojë të zbatohet edhe gjatë vitit në vijim. /skyweb.al
