Policia Rrugore e Tiranës ka vendosur mijëra gjoba gjatë javës së fundit, por numri i lartë i masave ndëshkuese nuk po arrin të ndalë tragjeditë në rrugët e vendit.
Sipas zërave të publikuar nga Policia, janë vendosur gjithsej 14,788 masa administrative, ndërsa 75 automjete janë bllokuar për shkelje të ndryshme. Ndërkohë, në njoftimin zyrtar totali deklarohet 13,467 masa, shifër që nuk përputhet me shumën e kategorive të renditura.
Vetëm për shkelje që lidhen me ndalimin, pushimin dhe qëndrimin janë vendosur 7,868 gjoba, ndërsa 4,998 drejtues janë ndëshkuar për shkelje të sigurisë rrugore.
Gjoba janë vendosur edhe ndaj 1,093 drejtuesve të motomjeteve pa kaskë, 418 personave pa rrip sigurimi, 309 shoferëve që përdornin celularin dhe 19 drejtuesve të kapur nën efektin e alkoolit. Për zhurma të shkaktuara nga modifikimet e paligjshme janë ndëshkuar 83 automjete.
Gjatë javës janë arrestuar gjithashtu 32 persona për vepra penale në fushën e qarkullimit rrugor. Dy prej tyre dyshohet se tentuan të korruptonin punonjësit e Policisë pasi u kapën duke drejtuar automjetin në gjendje të dehur.
Megjithatë, e hëna nisi me një tjetër bilanc tragjik: dy persona humbën jetën dhe nëntë të tjerë mbetën të plagosur në disa aksidente. Në autostradën Durrës–Tiranë, një 45-vjeçar humbi jetën pas një aksidenti zinxhir ku u përfshinë pesë automjete, ndërsa në aksin Levan–Tepelenë humbi jetën 55-vjeçari Dashmir Beca.
Shifrat tregojnë se gjobat dhe kontrollet policore, ndonëse të domosdoshme, nuk mjaftojnë për të frenuar aksidentet. Krahas ndëshkimit kërkohet më shumë ndërgjegjësim nga vetë drejtuesit e mjeteve, pasi shpejtësia, alkooli, celulari në timon dhe mosrespektimi i rregullave po vazhdojnë të kushtojnë jetë. /skyweb.al
