Kontrolli teknik i automjeteve mbetet një element kyç për sigurinë rrugore. Sipas të dhënave të Drejtorisë së Përgjithshme të Shërbimeve të Transportit Rrugor, gjatë muajve janar–shkurt 2026, rreth 16.301 automjete nuk kanë arritur të kalojnë kontrollin teknik.
Problemi më i shpeshtë lidhet me sistemin e shkarkimit të gazrave, që përbën rreth 34.5% të rasteve. Ky defekt ndikon jo vetëm në funksionimin e mjetit, por edhe në ndotjen e mjedisit dhe cilësinë e ajrit.
Rreth 30% e mjeteve kanë rezultuar me mangësi vizuale dhe funksionale, ndërsa afro 20% kanë pasur probleme në sistemin e drejtimit dhe amortizimit. Ndërkohë, 15.5% e automjeteve nuk kanë kaluar kontrollin për shkak të defekteve në sistemin e frenimit, një nga komponentët më kritikë për sigurinë në rrugë.
DPSHTRR u bën apel drejtuesve të mjeteve që të kontrollojnë dhe mirëmbajnë rregullisht automjetet e tyre për të garantuar sigurinë personale dhe atë të përdoruesve të tjerë të rrugës./skyweb.al
