Duke folur per ndërtimet e reja kryeministri Edi Rama tha se çmimet mbeten të papërballueshme për shtresën e varfër dhe të mesme, por prej këtyre ndërtimeve po arkëtohen taksa e strehimit 3% që po kontribuon te strehimi i përballueshëm.
Sipas kreut të qeverisë, Tirana po transformohet dhe kjo nuk vjen si pasojë e krimit.
“Jo çdo gjë në sektorin e ndërtimit është e pastër si drita e diellit. Këtë transformim të Shqipërisë, që sektori i ndërtimit e bën të prekshëm për këdo që vjen dhe viziton Shqipërinë, ta fusim në kornizën e krimit është e neveritshme dhe e papranueshme.
E kanë të vështirë ata që na vizitojnë të besojnë pse po bëhen ndërtime të tilla. Ka shumë arsye pse Shqipëria po zhvillon ndërtime të tilla. Është e pamundur që disa të pranojnë suksesin e Shqipërisë, ashtu siç është për ne e papranueshme që ndërtuesit të futen në një thes.
Vetëm nga ky projekt, ende pa filluar puna, Bashkia e Tiranës ka marrë 14 milionë euro taksa, një shumë e konsiderueshme. Ndërkohë që, kur projekti të përfundojë, komuniteti do të përfitojë një kopsht, ndërsa Bashkia e Tiranës një shkollë, pasi investitorit t’i jepet trualli.
Në këto 14 milionë euro është edhe pjesa prej 3% që shkon për strehimin. Pa diskutim që këto apartamente nuk i blen një i varfër apo ai që jeton me paga të ulëta apo mesatare. Por nga ndërtimi i tyre, Bashkia e Tiranës merr një taksë prej 3% vetëm për strehimin, për të ndërtuar dhe kontribuar në strehimin e përballueshëm. Transformimi i Tiranës nuk është nga krimi. 350 apartamente në këtë projekt, ose një e katërta e tyre, janë të blera nga diaspora dhe nuk paguhen me cash, por nëpërmjet bankave.
Prandaj është e rëndësishme që njerëzit të informohen. Ne po përpiqemi që, duke folur vetë, t’u tregojmë atyre që duan të informohen efektet zinxhir të një ekonomie që po rritet në mënyrë të qëndrueshme.
Çfarë lidhje ka demokrati Ramë Geci me krimin? Ai ka ndërtuar kullën më të lartë në Tiranë, hotelin Intercontinental. Ç’lidhje ka një kompani që eksporton në gjithë rajonin, siç është kompania Brunes, por edhe që ndërton, me krimin?
Ja ku është edhe demokrati tjetër, Avenir Kika, që ka ndërtuar plot apartamente për njerëzit; çfarë lidhje ka me krimin? Dhe të gjitha këto projekte rrisin ekonominë”, tha Rama.
