Gjashtë ministra dhe zëvendëskryeministrja e re janë betuar sot para Presidentit të Republikës Bajram Begaj, pasi morën votëbesimin një ditë më parë në Kuvendin e Shqipërisë. Ceremonia e betimit vjen pas ndryshimeve të rëndësishme në kabinetin qeveritar të kryeministrit Edi Rama.
Ristrukturimi i qeverisë përfshin emërimin e katër ministrave të rinj dhe lëvizje në disa prej dikastereve kryesore.
Diplomati Ferit Hoxha është emëruar ministër për Evropën dhe Punët e Jashtme. Ndërkohë, Enea Karakaçi, i cili deri tani drejtonte Operatorin e Shpërndarjes së Energjisë Elektrike, merr drejtimin e Ministrisë së Infrastrukturës dhe Energjisë.
Në krye të Ministrisë së Mbrojtjes është emëruar Ermal Nufi, i cili më parë ka mbajtur postin e zëvendëssekretarit të Përgjithshëm në Kryeministri. Ndërsa Eriona Ismaili do të drejtojë Ministrinë e Shtetit për Marrëdhëniet me Parlamentin.
Një nga ndryshimet kryesore në kabinet është edhe emërimi i Albana Koçiut në postin e zëvendëskryeministres. Ministria e Brendshme i është besuar Besfort Lamallarit, i cili për gjashtë muaj drejtoi Ministrinë e Drejtësisë.
Pas kalimit të Lamallarit në Ministrinë e Brendshme, drejtimin e Ministrisë së Drejtësisë e merr Toni Gogu.
Nga kabineti qeveritar janë larguar Belinda Balluku, Elisa Spiropali dhe Pirro Vengu.
Ndryshimet në qeveri u miratuan një ditë më parë në Kuvendin e Shqipërisë, në një seancë të tensionuar ku deputetët e opozitës bllokuan foltoren dhe nuk morën pjesë në procesin e votimit.
Ndryshimet në kabinetin qeveritar
Albana Koçiu – zëvendëskryeministre (zëvendëson Belinda Ballukun)
Enea Karakaçi – ministër i Infrastrukturës dhe Energjisë (zëvendëson Belinda Ballukun)
Besfort Lamallari – ministër i Brendshëm (zëvendëson Albana Koçiun)
Toni Gogu – ministër i Drejtësisë (zëvendëson Besfort Lamallarin)
Ferit Hoxha – ministër për Evropën dhe Punët e Jashtme (zëvendëson Elisa Spiropalin)
Ermal Nufi – ministër i Mbrojtjes (zëvendëson Pirro Vengun)
Eriona Ismaili – ministre për Marrëdhëniet me Parlamentin (zëvendëson Toni Gogun)
Ministrat e rinj në kabinet
Enea Karakaçi – ministër i Infrastrukturës dhe Energjisë
Ferit Hoxha – ministër për Evropën dhe Punët e Jashtme
Ermal Nufi – ministër i Mbrojtjes
Eriona Ismaili – ministre për Marrëdhëniet me Parlamentin
Ministrat që largohen nga kabineti
Belinda Balluku
Elisa Spiropali
Pirro Vengu
