Tregu i punës në Shqipëri ka shfaqur një situatë relativisht të qëndrueshme në fund të vitit 2025, sipas të dhënave më të fundit të publikuara nga INSTAT.
Në tremujorin e katërt të vitit 2025, shkalla e pjesëmarrjes në forcat e punës për popullsinë e grupmoshës 15 deri në 64 vjeç u regjistrua në 75.9%.
Ndërkohë, shkalla e papunësisë për popullsinë 15 vjeç e lart arriti në 8.3% në të njëjtën periudhë.
Të dhënat tregojnë se papunësia ka shënuar një rritje të lehtë krahasuar me tremujorin e tretë të vitit 2025, kur ky tregues ishte rreth 8.1%, duke reflektuar një rritje prej 0.2 pikë përqindje në fund të vitit.
Megjithatë, në krahasim me të njëjtën periudhë të vitit 2024, niveli i papunësisë rezulton më i ulët. Në tremujorin e katërt të vitit 2024 papunësia ishte 8.8%, çka do të thotë se gjatë një viti është ulur me 0.5 pikë përqindje.
Sipas të dhënave të INSTAT, papunësia mbetet më e lartë tek të rinjtë e grupmoshës 15 deri në 29 vjeç, ndërsa tek popullsia e moshës 30 deri në 64 vjeç niveli është më i ulët dhe më i qëndrueshëm.
Diferenca mes këtyre dy grupmoshave mbetet një nga karakteristikat kryesore të tregut të punës në vend.
Ndryshime vërehen edhe sipas gjinisë. Në tremujorin e fundit të vitit 2025, papunësia tek gratë rezulton rreth 9.4%, ndërsa tek burrat rreth 7.4%.
Në tërësi, të dhënat tregojnë se gjatë vitit 2025 tregu i punës në Shqipëri ka shfaqur një përmirësim të lehtë në baza vjetore, ndërsa luhatjet tremujore tregojnë se dinamika e punësimit mbetet e ndikuar edhe nga faktorë sezonalë dhe zhvillimet ekonomike. /skyweb.al
