Ndotja nga plastika nuk është më vetëm problem i oqeaneve, ajo mund të jetë shumë më afër nga sa mendohej. Një studim i fundit ka zbuluar se truri mesatar i njeriut mund të përmbajë mikroplastikë në sasi të barabartë me rreth pesë kapakë shishesh plastike.
Sipas një analize të publikuar në The New York Times, shkencëtarët vetëm tani kanë filluar të kuptojnë se çfarë mund të nënkuptojë kjo për shëndetin e njeriut.
Në një studim të rëndësishëm të udhëhequr nga studiues të Universitetit të New Mexico-s, u analizuan mostra të trurit të njerëzve dhe u zbulua se në vitin 2024, ato përmbanin pothuajse 50% më shumë mikroplastikë sesa mostrat e marra vetëm tetë vite më parë.
Mesatarisht, një tru përmbante rreth 7 gramë plastikë, afërsisht sa pesha e një luge plastike të përdorimit njëherësh.
Edhe më shqetësues është fakti se studiuesit gjetën nivele më të larta mikroplastike në trurin e personave që vuanin nga demenca. Megjithatë, shkencëtarët theksojnë se kjo mund të lidhet me faktin që truri i këtyre pacientëve ka një barrierë gjak-tru më të dobët, duke e bërë më të vështirë eliminimin e toksinave.
Studime të tjera kanë zbuluar grimca plastike edhe në placentën njerëzore, në qarkullimin e gjakut dhe madje në jashtëqitjen e parë të foshnjave.
Toksikologu Matthew Campen tha për The New York Times se rritja e plastikës në mjedis po reflektohet edhe në trupin e njeriut:
“Kjo substancë po rritet në botën tonë në mënyrë eksponenciale”.
Disa grimca mikroplastike janë aq të vogla sa mund të kalojnë barrierat mbrojtëse të trupit dhe të grumbullohen në organe si truri. Edhe pse shkencëtarët ende nuk e dinë saktësisht se sa plastikë është e rrezikshme për organizmin, studimet e para tregojnë se ajo mund të lidhet me probleme serioze shëndetësore.
Hulumtimet aktuale e lidhin mikroplastikën me:
rënie të aftësive njohëse
probleme riprodhuese
dobësim të sistemit imunitar
humbje të kujtesës
çrregullime hormonale
probleme zhvillimi te fëmijët
Për më tepër, mikroplastika ndot edhe tokën dhe ujin, duke rrezikuar jo vetëm njerëzit, por edhe ekosistemet dhe sistemet ushqimore.
Studiuesit po vazhdojnë kërkimet për të kuptuar më mirë ndikimin e mikroplastikës në tru dhe në sëmundje si sëmundja e Parkinsonit apo çrregullimet e kujtesës.
Ndërkohë, disa vende si Franca, Anglia dhe India kanë vendosur ndalime për disa produkte plastike njëpërdorimëshe. Edhe qytete të mëdha si Los Angeles dhe New York City po kufizojnë përdorimin e artikujve si stiropori dhe qeset plastike.
Ekspertët rekomandojnë gjithashtu disa hapa që mund të ndërmerren nga individët:
përdorimi i produkteve të ripërdorshme në vend të plastikës njëpërdorimshe
shmangia e ngrohjes së ushqimit në enë plastike në mikrovalë
përdorimi i qeseve speciale për kapjen e mikro-fibrave gjatë larjes së rrobave
Shkencëtarët paralajmërojnë se ndotja nga plastika nuk është më vetëm një problem mjedisor, por një sfidë serioze për shëndetin publik në nivel global.
