Ministrja e Shtetit për Administratën Publike dhe Antikorrupsionin, Adea Pirdeni, njoftoi hapjen e aplikimeve për Programin e Ekselencës 2026, përmes të cilit studentët dhe të diplomuarit me rezultate të larta kanë mundësi të punësohen në administratën publike.
Në kuadër të programit janë shpallur 210 pozicione të lira pune në 91 institucione publike.
“210 pozicione pune në 91 institucione publike. Hapim sot aplikimet për Programin e Ekselencës 2026. Për të diplomuarit me rezultatet më të larta, ata që kanë shumë rrugë përpara, por që zgjedhin rrugën ku mund të lënë gjurmë”, deklaroi Pirdeni.
Ministrja u bëri thirrje të rinjve që plotësojnë kriteret të shfrytëzojnë mundësinë për të nisur një karrierë në administratën publike.
Të interesuarit mund të konsultohen me kriteret e aplikimit dhe të dorëzojnë kërkesën përmes faqes zyrtare të Departamentit të Administratës Publike (DAP). Afati i aplikimeve është 1 tetor 2026.
“Kjo nuk është thjesht një thirrje për punë, është një mundësi për të ndërtuar karrierën tënde duke ndërtuar Shqipërinë evropiane”, u shpreh Pirdeni.
Programi synon të afrojë në administratën publike të rinj me rezultate të larta akademike, duke u ofruar mundësi punësimi dhe zhvillimi profesional në institucionet shtetërore.
