Presidenti i Serbisë, Aleksandar Vuçiç, ka sulmuar deklaratat e drejtuesve politikë shqiptarë pas dënimit nga Gjykata Speciale të Hashim Thaçit, Jakup Krasniqit, Kadri Veselit dhe Rexhep Selimit.
Vuçiç tha se e kishte planifikuar qëllimisht daljen e tij në orën 18:30, për të pritur reagimet e liderëve të rajonit, të cilat, sipas tij, dëshmojnë “hipokrizinë dhe standardet e dyfishta” me të cilat përballet Serbia.
“Po prisja të shihja deklaratat e të gjithëve, që edhe ju të shihnit se me çfarë problemesh përballet Serbia sot dhe sa shumë hipokrizi ka”, deklaroi presidenti serb.
Ai lexoi fillimisht reagimin e Presidentit të Shqipërisë, Bajram Begaj, i cili shprehu “trishtim të thellë” për vendimin dhe deklaroi se “për shqiptarët, askush dhe asgjë nuk mund ta njollosë UÇK-në” dhe se “liria ka një emër”.
“Vetëm imagjinoni sikur një prej zyrtarëve tanë të thoshte ‘Liria ka një emër’ dhe të përmendte cilindo serb të dënuar nga Tribunali i Hagës”, u shpreh Vuçiç.
Presidenti serb iu referua edhe reagimit të Kryeministrit Edi Rama, i cili pas shpalljes së aktgjykimit publikoi në rrjetet sociale vetëm fjalën “Turp”.
Në listën e reagimeve të kritikuara nga Vuçiç ishte edhe ai i kryeministrit të Kosovës, Albin Kurti, i cili e cilësoi vendimin “një padrejtësi të papranueshme” dhe shprehu shpresën se ai do të ndryshohet në apel.
Vuçiç veçoi gjithashtu deklaratën e zëvendëskryeministrit të Malit të Zi, Nik Gjeloshaj, i cili e quajti aktgjykimin “jashtëzakonisht të padrejtë” dhe deklaroi se “çdo shqiptar e mban në zemër luftën e shenjtë të UÇK-së”.
“A do t’ia ndalojnë Malit të Zi integrimin evropian sepse pështyjnë mbi aktgjykimin dhe mohojnë sundimin e ligjit? Apo kjo vlen vetëm për serbët?”, pyeti Vuçiç.
Ai kritikoi edhe reagimet e politikanëve shqiptarë në Maqedoninë e Veriut, mes tyre Bekim Sali, Afrim Gashi dhe Ali Ahmeti. Ky i fundit e cilësoi vendimin të padrejtë dhe thellësisht zhgënjyes.
“Unë mendoja se ata ishin kriminelë, të paktën të dënuar në shkallën e parë. Por jo, ata qenkan të gjithë çlirimtarë, heronj dhe heroina”, deklaroi me ironi presidenti serb.
Sipas Vuçiçit, reagimet e liderëve të rajonit tregojnë se ekzistojnë standarde të ndryshme për serbët dhe popujt e tjerë të ish-Jugosllavisë.
“Serbët duhet të jenë kriminelë në çdo komunikatë dhe në çdo deklaratë. Mund të ketë vendime të formës së prerë ose jo, nuk ka rëndësi. Serbët do të jenë gjithmonë kriminelë, ndërsa të gjithë të tjerët çlirimtarë dhe heronj”, tha ai.
Vuçiç deklaroi se Serbia duhet të vazhdojë të zhvillojë kulturën e kujtesës për viktimat serbe, pasi, sipas tij, nëse Beogradi nuk i përkujton ato, askush tjetër nuk do ta bëjë.
Pavarësisht toneve të ashpra, presidenti serb tha se politika e vendit të tij duhet të mbetet e përqendruar te paqja dhe vazhdimi i dialogut me Kosovën dhe vendet e rajonit.
“Dialogu është gjithmonë një zgjidhje më e mirë se konflikti. Do të përpiqemi t’i përmirësojmë marrëdhëniet, por jo duke pranuar që të poshtërohet dhe të mposhtet Serbia”, përfundoi Vuçiç.
Dhomat e Specializuara të Kosovës në Hagë dënuan në shkallë të parë Hashim Thaçin dhe Jakup Krasniqin me nga 25 vjet burg, Kadri Veselin me 18 vjet dhe Rexhep Selimin me 13 vjet. Vendimi mund të apelohet. Dhomat e Specializuara të Kosovës./skyweb.al
