Një nga plazhet më të veçanta të Rivierës Shqiptare është përfshirë në listën e 10 plazheve më të bukura dhe më pak të njohura të Europës, të rekomanduara për turistët që kërkojnë destinacione larg turmave.
Platforma ndërkombëtare DiscoverCars.com ka përzgjedhur plazhin e Gjipesë, mes Himarës dhe Dhërmiut, si një prej “thesareve të fshehura” të kontinentit që ia vlen të vizitohet gjatë verës.
Gjipe përshkruhet si një plazh i izoluar mes shpateve mbresëlënëse të kanionit, me ujëra të kristalta në ngjyrë të kaltër dhe natyrë kryesisht të paprekur.
Pikërisht mungesa e ndërtimeve dhe infrastruktura e kufizuar konsiderohen pjesë e tërheqjes së tij.
Për të mbërritur në plazh duhet të ecet rreth 30 minuta në një shteg shkëmbor, ndërsa zona e parkimit ndodhet rreth 2.5 kilometra larg bregut.
Në plazh nuk ka struktura të mëdha të organizuara, përveç disa pikave të vogla që funksionojnë gjatë kulmit të sezonit turistik.
Sipas DiscoverCars.com, vështirësia relative për të mbërritur në disa prej plazheve të përzgjedhura është pikërisht një nga arsyet pse ato kanë ruajtur natyrën dhe nuk janë mbipopulluar.
Krahas Gjipesë, në listë janë përfshirë edhe Cape Possidi në Greqi, Ramla Bay në Maltë, Beritnica Beach në Kroaci, Praia de Mata dhe Garajau në Portugali, si dhe plazhe në Spanjë dhe Itali.
Platforma argumenton se gjithnjë e më shumë turistë po kërkojnë alternativa ndaj destinacioneve të mbipopulluara, duke preferuar plazhe më të qeta dhe me mjedis natyror të ruajtur.
Për Gjipen, përfshirja në listë është një tjetër vlerësim ndërkombëtar për potencialin e Rivierës Shqiptare, e cila po tërheq gjithnjë e më shumë vëmendjen e turistëve të huaj. /skyweb.al
