Një zjarr i regjistruar në orët e para të mëngjesit pranë shkollës “Kushtrimi i Lirisë” në Durrës shkaktoi shkrumboi disa kazanë mbeturinash dhe për pasojë edhe tre automjete të parkuara në afërsi të tyre.
Flakët, sipas informacioneve paraprake, nisën te kazanët e mbeturinave dhe më pas u përhapën drejt automjeteve të parkuara.
Njëri prej mjeteve raportohet se ka pësuar dëmtime të konsiderueshme materiale.
Sigurime.Online, si përherë, sjell në vëmendje të lexuesve se nuk përcakton shkakun e zjarrit dhe as përgjegjësinë ligjore për ngjarjen. Trajtimi ynë në këtë shkrim ka vetëm qëllime informuese, për të shpjeguar se cilat mekanizma sigurimi mund të aktivizohen në raste të tilla.
Pse sigurimi TPL (i detyrueshëm) nuk mbulon dëmin e automjetit të djegur?
Keqkuptimi i zakonshëm është se çdo dëm që pëson një automjet duhet të mbulohet nga sigurimi i detyrueshëm i mjeteve motorike (TPL).
Nuk është kështu.
Sigurimi TPL mbron palët e treta, dhe merr përsipër përgjegjësinë ndaj tyre.
Ndryshe: TPL mbulon dëmet që drejtuesi i një automjeti u shkakton personave ose pasurive të tjera gjatë përdorimit të mjetit, kur ai mban përgjegjësi për aksidentin.
Në rastin e një automjeti që dëmtohet nga një zjarr i shkaktuar jashtë tij, për shembull nga djegia e kazanëve të mbeturinave apo një burim tjetër i jashtëm, si në rastin e Durrësit, TPL nuk është instrumenti i sigurimit që aktivizohet për riparimin e automjetit të pronarit të dëmtuar.
AS TPL e mjetit të dëmtuar, e asnjë TPL tjetër për shkak se dëmi nuk erdhi si pasojë e drejtimit apo përdorimit të mjetit.
TPL nuk është sigurim për dëmet që i ndodhin vetë mjetit të siguruar, sidomos kur ky është në parkim. Kjo shtron një pyetje tjetër me shumë vend.
Cili sigurim do të duhej për një rast të tillë?
Për dëmtime të automjetit nga ngjarje të tilla si: zjarr i jashtëm; djegie aksidentale; vandalizëm (në varësi të kushteve të policës); dëmtime të tjera të paparashikuara; mbulimi tipik realizohet përmes sigurimit KASKO.
Nëse një nga tre automjetet e dëmtuara do të kishte një policë KASKO aktive, kompania e sigurimit do të analizonte:
- shkakun e zjarrit;
- rrethanat e ngjarjes;
- nëse pronari i mjetit ka pasur dijeni apo përfshirje në krijimin e rrezikut;
- kushtet dhe përjashtimet e kontratës.
Nëse nga hetimi rezulton se pronari i automjetit nuk ka pasur asnjë lidhje me shkaktimin e zjarrit dhe dëmi është pasojë e një ngjarjeje të jashtme dhe aksidentale, mund të aktivizohet mbulimi KASKO dhe dëmi në automjet mund të dëmshpërblehet sipas kushteve të kontratës.
Në rast se hetimet identifikojnë një person përgjegjës për shkaktimin e zjarrit, kompania e sigurimit, pasi dëmshpërblen të siguruarin sipas kontratës KASKO, mund të kërkojë rikuperimin e shumës së paguar përmes të drejtës së regresit ndaj personit përgjegjës.
Mësimi nga rasti i Durrësit
Një automjet mund të jetë i siguruar për të qarkulluar ligjërisht me TPL, por kjo nuk do të thotë se është i mbrojtur nga çdo rrezik që mund t’i ndodhë.
TPL mbron përgjegjësinë ndaj të tretëve.
KASKO mbron vetë automjetin nga një gamë më e gjerë rreziqesh, sipas kushteve të policës.
Në një situatë si ajo e Durrësit, ku një burim i jashtëm zjarri dëmton mjete të parkuara, mbrojtja financiare varet nga ekzistenca e një sigurimi për vetë automjetin, jo vetëm nga sigurimi i detyrueshëm TPL./sigurime.online
