Grupi Batalioni i Këmbësorisë së Lehtë (GBKL) është certifikuar “I aftë për mision”, pas përfundimit të procesit të vlerësimit të zhvilluar në kuadër të stërvitjes “Mburoja e Arbrit-26”, në rajonin stërvitor të Bizës.
Në ceremoninë përmbyllëse të stërvitjes, ku morën pjesë presidenti i Republikës, Bajram Begaj; shefi i Shtabit të Përgjithshëm të FA, gjenerallejtënant Arben Kingji; komandantë, përfaqësues të NATO-s, atashe ushtarakë dhe partnerë, ministri i Mbrojtjes Ermal Nufi e vlerësoi certifikimin si një arritje të rëndësishme për Forcën Tokësore dhe Forcat e Armatosura.
“Sot, rezultati flet qartë: Grupi i Batalionit të Këmbësorisë së Lehtë është certifikuar ‘I aftë për mision’. Kjo është një arritje, për të cilën duhet të jemi krenarë. Por, ndër të tjera, është edhe përgjegjësi. Përgjegjësi për të ruajtur standardin, për ta kthyer këtë përvojë në një kapacitet të qëndrueshëm operacional dhe përgjegjësi për të qenë të gatshëm ta dëshmojmë këtë aftësi sa herë që misioni e kërkon”, u shpreh ministri Nufi.
Certifikimi kombëtar u zhvillua nën monitorimin e përfaqësuesve të NATO-s, duke vënë në fokus standardizimin dhe ndërveprueshmërinë e Forcave të Armatosura shqiptare me forcat aleate.
“Shqipëria është dhe do të mbetet një aleate e angazhuar, që kontribuon me përgjegjësi në Aleancë dhe punon vazhdimisht për të rritur aftësitë e saj. Në këtë drejtim, modernizimi i Forcave të Armatosura është një proces i pandalshëm”, deklaroi ministri i Mbrojtjes.
Duke e lidhur procesin e certifikimit me transformimin e Forcave të Armatosura, ministri Nufi theksoi se modernizimi nuk lidhet vetëm me pajisjet, por edhe me mënyrën e planëzimit, stërvitjes dhe zhvillimit të operacioneve.
“Modernizimi që po ndërmarrim synon pikërisht këtë: të ndërtojmë Forca të Armatosura më të afta, më të lëvizshme, më të mbrojtura, më teknologjike dhe plotësisht të ndërveprueshme me forcat e vendeve aleate.”, u shpreh ai.
Në përfundim të ceremonisë, ministri Nufi vlerësoi punën e komandantëve, shtabeve, instruktorëve, vlerësuesve dhe të gjithë ushtarakëve e civilëve të angazhuar në stërvitje, duke nënvizuar se certifikimi është dëshmi e punës, disiplinës, përgatitjes dhe profesionalizmit të tyre.
“Mburoja e Arbrit-26” përbën një tjetër hap në konsolidimin e kapaciteteve operacionale dhe në rritjen e gatishmërisë së Forcave të Armatosura për përmbushjen e misioneve kombëtare dhe angazhimeve në kuadër të Aleancës së NATO-s.
Në fjalën e tij përshëndetëse gjatë ceremonisë, presidenti Begaj e cilësoi certifikimin si dëshmi të progresit të Forcave të Armatosura, si dhe të nivelit të lartë të përgatitjes, disiplinës dhe profesionalizmit të efektivëve.
“Sot, këtu në Bizë, ju dëshmuat jo vetëm përgatitje të lartë taktike, por edhe rezistencë e karakter të fortë ushtarak. Ju treguat aftësinë për të planifikuar, për të koordinuar dhe për të vepruar në një mjedis kompleks operacional”, u shpreh Begaj.
Në cilësinë e komandantit të Përgjithshëm të Forcave të Armatosura, ai theksoi rëndësinë e gatishmërisë ushtarake, e cila, sipas tij, ndërtohet përmes stërvitjes së vazhdueshme dhe profesionalizmit.
Duke iu referuar situatës së sigurisë në rajon dhe më gjerë, përfshirë luftën në Ukrainë, tensionet në Lindjen e Mesme, kërcënimet hibride, sulmet kibernetike dhe dezinformimin, Begaj nënvizoi nevojën për forcimin e kapaciteteve mbrojtëse dhe garantimin e sigurisë kombëtare.
Presidenti u ndal gjithashtu te rëndësia e aleancave dhe veçanërisht e partneritetit me NATO-n dhe Shtetet e Bashkuara të Amerikës. Ai theksoi se certifikimi “I aftë për mision” përfaqëson aftësinë reale të forcave për t’u dislokuar dhe për të vepruar me efikasitet operacional, përkrah aleatëve, kurdo që kërkohet.
Begaj vlerësoi edhe rolin e investimeve në industrinë e mbrojtjes, modernizimin e strukturave, zhvillimin e kapaciteteve ushtarake dhe infrastrukturës së mbrojtjes.
Në këtë kuadër, ai vlerësoi partneritetin strategjik me Shtetet e Bashkuara dhe mbështetjen e vazhdueshme amerikane për rritjen e kapaciteteve mbrojtëse të Shqipërisë.
