Shqipëria po përgatitet të rrisë ndjeshëm shpenzimet për uljen e ndotjes në dekadën e ardhshme. Qeveria ka nxjerrë për konsultim një VKM, përmes së cilës parashikon investimet dhe objektivat e uljes së ndotjes.
Dokumenti, që lidhet me përditësimin e Kontributit Kombëtar të Përcaktuar (KKP 3.0), përcakton angazhimet për periudhën 2026–2035 dhe synon një reduktim më të thellë të gazeve me efekt serrë në sektorët kryesorë të ekonomisë.
Projektvendimi fokusohet në pesë sektorët kryesorë që gjenerojnë ndotje, përfshirë energjinë, industrinë, bujqësinë, përdorimin e tokës dhe mbetjet, duke parashikuar masa konkrete për transformimin gradual të tyre.
Qasja synon dekarbonizimin e ekonomisë dhe përafrimin me standardet e Bashkimit Europian në fushën e klimës.
Për realizimin e këtyre objektivave, dokumenti parashikon investime të mëdha.
Sipas përllogaritjeve, nevojiten rreth 2.6 miliardë euro në skenarin bazë, ndërsa me masa shtesë kjo shifër arrin deri në 6.9 miliardë euro.
Ndërkohë, për masat e përshtatjes ndaj ndryshimeve klimatike llogariten edhe rreth 9.8 miliardë dollarë, duke e çuar totalin në nivele shumë të larta për ekonominë shqiptare.
Rritja e ambicies në këtë plan vjen edhe pas evidentimit të problemeve në zbatimin e strategjisë aktuale, e cila sipas vetë dokumentit nuk ka arritur rezultatet e pritshme në uljen e emetimeve.
Për këtë arsye, KKP 3.0 synon objektiva më realistë dhe masa më të zbatueshme, të shoqëruara me mekanizma më të fortë monitorimi dhe raportimi.
Dokumenti lidhet drejtpërdrejt me angazhimet ndërkombëtare të Shqipërisë në kuadër të Marrëveshjes së Parisit dhe procesin e integrimit në Bashkimin Europian, ku politikat klimatike janë pjesë e kapitullit për mjedisin.
Në të njëjtën kohë, ai synon të orientojë investimet publike dhe private drejt sektorëve më të ndjeshëm, duke ndikuar në zhvillimin ekonomik afatgjatë të vendit.
Nxjerrja e projektvendimit për konsultim publik sinjalizon fazën paraprake të miratimit të tij, ndërsa pritshmëritë janë që ky dokument të përcaktojë drejtimin e politikave klimatike dhe investimeve strategjike të Shqipërisë për dekadën e ardhshme. /skyweb.al
