Tregtia me pakicë ka shënuar një rritje të ndjeshme në tremujorin e parë të vitit 2025, e nxitur nga rritja e konsumit dhe ndikimi pozitiv i turizmit. Sipas të dhënave të publikuara nga INSTAT, indeksi i volumit të shitjeve në këtë sektor arriti në 107.2, duke shënuar një rritje vjetore prej 7.0% krahasuar me të njëjtën periudhë të vitit 2024. Ky tregues, i përshtatur për efektet sezonale, është rritur gjithashtu me 1.4% krahasuar me tremujorin e fundit të vitit të kaluar.
Rritja është ndikuar veçanërisht nga tre grupe kryesore produktesh:
Tregtia me pakicë e hidrokarbureve në njësi të specializuara shënoi një rritje vjetore prej 13.2%, duke kontribuar me +3.2 pikë përqindje në rritjen totale.
Artikujt jo-ushqimorë në njësi të specializuara dhe jo të specializuara kontribuan me +2.4 pikë përqindje.
Ushqimet, pijet dhe duhani në njësi të specializuara dhe jo-specializuara dhanë një kontribut prej +1.4 pikë përqindje.
Në krahasim me tremujorin e katërt të vitit 2024, tregtia me pakicë, pa përfshirë hidrokarburet, është rritur me 1.7%. Ndërkohë, tregtia me pakicë e hidrokarbureve, pas rregullimit për efektet sezonale, ka shënuar një rënie të lehtë prej 0.3%.
Indeksi është llogaritur mbi bazën e deflatimit të shitjeve në vlerë, duke reflektuar rritjen reale të volumit të tregtisë dhe jo vetëm ndryshimet në çmime. Kjo tregon një zgjerim të qëndrueshëm të konsumit, që lidhet edhe me rritjen e numrit të turistëve dhe rigjallërimin ekonomik në fillim të vitit.
Përjashtuar tregtinë me pakicë të hidrokarbureve, volumi i shitjeve është rritur me 4.9% në tremujorin e parë 2025, krahasuar me të njëjtën periudhë të vitit të kaluar, duke konfirmuar një prirje pozitive në sektorin e konsumit të brendshëm.
Ky trend i qëndrueshëm vjen në një kohë kur pritshmëritë për turizmin mbeten të larta për pjesën e mbetur të vitit, duke shtuar presionin mbi ofertën vendase për të mbajtur ritmet e kërkesës në rritje. /skyweb.al
