Misioni hapësinor “Artemis II” është përmbyllur me sukses, teksa katër astronautët u rikthyen në Tokë pas një udhëtimi historik rreth Hënës, duke shënuar një nga arritjet më të rëndësishme të eksplorimit hapësinor në dekadat e fundit.
Anija kozmike “Orion” u ul në Oqeanin Paqësor, pranë brigjeve të Kalifornisë, pas një misioni rreth 10-ditor, gjatë të cilit ekuipazhi udhëtoi më larg nga Toka se çdo njeri më parë, duke thyer rekorde historike të vendosura që nga epoka e Apollo-s.
Në bord ndodheshin astronautët Reid Wiseman, Victor Glover, Christina Koch dhe Jeremy Hansen, të cilët përjetuan pamje të papara më parë nga ana e largët e Hënës, si dhe fenomene të rralla si eklipsi diellor i vëzhguar nga hapësira.
Gjatë kalimit në anën e errët të Hënës, komunikimi me Tokën u ndërpre për disa minuta , një fazë e parashikuar e misionit duke shtuar tensionin në qendrat e kontrollit të NASA-s, deri në rikthimin e sinjalit.
Rikthimi i kapsulës në Tokë u realizua përmes një uljeje të kontrolluar me parashuta, ndërsa ekipet e shpëtimit ndërhynë menjëherë për të marrë ekuipazhin. Momenti u shoqërua me emocione dhe duartrokitje në qendrat e NASA-s, duke konfirmuar suksesin e plotë të misionit.
“Artemis II” konsiderohet një hap kyç drejt rikthimit të njeriut në Hënë, pasi shërben si provë për misionet e ardhshme që synojnë uljen e astronautëve në sipërfaqen hënore në vitet në vijim.
