Banorët e kompleksit “Arlis”, në zonën e njohur si “Farmacia 10” në Tiranë, kanë firmosur një peticion me një sërë kërkesash drejtuar institucioneve shtetërore dhe kompanisë ndërtuese, pas zjarrit që la dhjetëra familje jashtë banesave të tyre.
Në qendër të kërkesave është dëmshpërblimi i plotë i dëmeve, mbulimi i qirasë deri në rikonstruksionin e apartamenteve dhe rikthimi i tyre në gjendjen e mëparshme, sipas kontratave të nënshkruara me ndërtuesin.
Banorët kërkojnë gjithashtu transparencë të plotë nga kompania ndërtuese për materialet e përdorura dhe procesin e kontrollit të cilësisë gjatë ndërtimit, si dhe përcaktimin e përgjegjësive ligjore dhe administrative nëse konstatohet shkelje e standardeve të sigurisë.
Një nga pikat kryesore të peticionit është kryerja e një ekspertize të pavarur teknike, për të vlerësuar sigurinë e materialeve termoizoluese në fasadë dhe zëvendësimi i menjëhershëm i çdo materiali të rrezikshëm me produkte të certifikuara dhe rezistente ndaj zjarrit.
Po ashtu, banorët kërkojnë një audit të plotë të sistemit kundër zjarrit, duke përfshirë alarmet, pajisjet e fikjes, rrugët e evakuimit dhe funksionimin e hidrantëve, për të cilët pretendojnë se kanë qenë jashtë funksionit në momentin e incidentit.
Në peticion përfshihet edhe kërkesa për formalizimin e kontratave të porosisë pranë noterit, si dhe garantimin e strehimit për të gjitha familjet e prekura deri në rikthimin në banesa.
Në një plan më të gjerë, banorët bëjnë thirrje që në Shqipëri të zbatohen standardet europiane EN për instalimet elektrike, ujësjellësin, gazin dhe ashensorët, duke kërkuar edhe kontrolle periodike të detyrueshme për ndërtesat e banimit.
Ata propozojnë që çdo instalim të pajiset me certifikatë sigurie dhe garancie sipas standardeve europiane, si dhe të vendoset detyrimi për kontroll të përgjithshëm të instalimeve pas një periudhe maksimale prej 20 vitesh.
Mes kërkesave përfshihet edhe instalimi i detyrueshëm i pajisjeve mbrojtëse elektrike, si “salvavita”, dhe matja e tokëzimit si element kyç për sigurinë në banesa.
Peticioni mbyllet me thirrjen për më shumë siguri dhe përgjegjësi institucionale, në një kohë kur zjarri në kompleksin “Arlis” ka ngritur pikëpyetje serioze mbi cilësinë e ndërtimit dhe standardet e sigurisë në pallatet e reja në kryeqytet. /skyweb.al
