Operacion i shtrirë në kohë dhe i ndjekur me metoda speciale hetimi ka zbuluar një skemë të dyshuar për falsifikim dokumentesh me qëllim pajisjen e shtetasve me pasaporta bullgare. Policia e Dibrës ka finalizuar aksionin e koduar “Identiteti”, duke arrestuar një shtetas bullgar dhe duke proceduar dy zyrtarë lokalë.
Në pranga është vënë E.T, 49 vjeç, banues në Sofje, i cili u ndalua në dalje të Pikës së Kalimit Kufitar Bllatë. Sipas policisë, gjatë kontrollit në automjetin që ai drejtonte janë gjetur 21 dokumente të dyshuara të falsifikuara, që i përkisnin 21 shtetasve të ndryshëm. Dyshohet se këto dokumente do të përdoreshin për të përfituar pasaporta bullgare.
Hetimet, të zhvilluara për rreth një muaj nga specialistët e krimit ekonomik dhe financiar në Drejtorinë Vendore të Policisë Dibër, kanë nxjerrë në pah një mekanizëm që lidhet me falsifikimin e dokumenteve të gjendjes civile. Sipas të dhënave, shtetas të ndryshëm pajiseshin me vërtetime sikur ishin banorë të njësisë administrative Ostren, në Bashkinë Bulqizë, dokumente që më pas dërgoheshin në Bullgari.
Në këtë kuadër, Prokuroria ka nisur procedim penal ndaj administratorit aktual të njësisë administrative Ostren, N.S., 53 vjeç, dhe ish-administratorit B.M., 62 vjeç. Ata dyshohen se gjatë ushtrimit të detyrës kanë vepruar në kundërshtim me ligjin, duke lëshuar dhe falsifikuar dokumente zyrtare për persona të ndryshëm, me qëllim përfitimin e shtetësisë apo pasaportave bullgare.
Operacioni u zhvillua në bashkëpunim me Policinë Kufitare dhe nën drejtimin e Prokurorisë së Dibrës. Autoritetet bëjnë me dije se hetimet vijojnë për të identifikuar persona të tjerë të përfshirë në këtë aktivitet të paligjshëm dhe për dokumentimin e plotë të skemës.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër për veprime të mëtejshme.
