Administrata Tatimore ka kompensuar automatikisht 10.4 milionë euro tepricë kreditore me detyrimet e papaguara të tatimpaguesve, në kuadër të zbatimit të ligjit për faljen e detyrimeve tatimore.
Sipas njoftimit zyrtar, nga kjo procedurë kanë përfituar 13,408 tatimpagues, ndërsa janë realizuar në total 86,773 transaksione.
Kompensimi është kryer automatikisht, pa qenë e nevojshme që bizneset të paraqesin kërkesë apo të ndjekin procedura shtesë. Përmes këtij procesi, tepricat kreditore të tatimpaguesve janë përdorur për të ulur detyrimet tatimore të papaguara.
Administrata Tatimore njoftoi më herët se, duke nisur nga 10 qershori 2026, kanë filluar edhe pagesat për përfitimin nga falja me kusht e detyrimeve tatimore, gjobave dhe kamatëvonesave, sipas ligjit nr. 86/2025.
Për detyrimet e krijuara gjatë periudhës 2015–2019, tatimpaguesit mund të përfitojnë fshirjen e 50% të principalit dhe fshirjen e plotë të gjobave dhe kamatëvonesave, në rast se 50% e mbetur paguhet njëherësh deri më 30 qershor 2026.
Për të njëjtën periudhë, parashikohet edhe fshirja e 25% të principalit dhe e plotë e gjobave dhe kamatëvonesave, nëse 75% e detyrimit paguhet deri më 31 dhjetor 2026.
Ndërsa për detyrimet e periudhës 2020–2024, ligji parashikon fshirjen e plotë të gjobave dhe kamatëvonesave, me kusht që tatimpaguesi të paguajë 100% të detyrimit principal deri më 31 dhjetor 2026.
Administrata Tatimore u ka bërë thirrje bizneseve që të verifikojnë situatën e tyre në sistemin e-Filing dhe të kryejnë pagesat brenda afateve, për të përfituar nga lehtësitë e parashikuara në ligj.
