Kostoja e zhdoganimit të automjeteve të importuara pritet të rritet pas ndryshimit të vlerave minimale të deklarimit në doganë.
Udhëzimi i ri, i botuar në Fletoren Zyrtare, parashikon rritje të ndjeshme të çmimeve referuese që përdoren për zhdoganimin e automjeteve të sjella nga jashtë.
Për një automjet me cilindratë deri në 1 400 kubikë, vlera e deklaruar në doganë nuk mund të jetë më e ulët se 162 500 lekë. Deri më tani, kufiri minimal ishte 130 mijë lekë.
Ndryshime parashikohen edhe për automjetet me cilindratë nga 1 900 deri në 2 500 kubikë. Për këtë kategori, çmimi dysheme rritet nga 325 mijë në 406 mijë lekë.
Rritja më e fortë prek automjetet me cilindratë mbi 4 500 kubikë. Vlera minimale e deklarimit për këto makina bëhet 1 milion lekë, nga 800 mijë lekë që ishte deri tani.
Udhëzimi ndryshon gjithashtu çmimet referuese për zhdoganimin e kamioçinave, furgonëve dhe kamionëve.
Për automjetet e këtyre kategorive me peshë deri në 1.5 tonë, vlera minimale që mund të deklarohet në doganë rritet nga 400 mijë në 500 mijë lekë.
Ndërsa për kamioçinat, furgonët dhe kamionët me peshë nga 3.5 deri në 10 tonë, çmimi dysheme i deklarimit kalon në mbi 1 milion lekë, nga 850 mijë lekë që ishte më parë.
Ndryshimet prekin veçanërisht automjetet e përdorura që importohen në Shqipëri.
Qëllimi i udhëzimit të ri është shmangia e nëndeklarimit të vlerës së automjeteve të blera jashtë vendit, duke vendosur kufij më të lartë referues për llogaritjen e detyrimeve doganore.
