Teksa SPAK ka konfirmuar takimin e famshëm të Arubës, për të cilin kanë folur edhe mediat italiane, nga hetimet rezulton se shumë prej këtyre takimeve kryheshin mes kokave të botës së krimit për planifikime për të nxjerrë leje ndërtimi. Sipas SPAK, personat nën hetim Artur Shehu, Adrian Rama, Elton Memeti etj., kanë kryer edhe takime me njëri-tjetrin jashtë vendit, në Spanjë dhe në Aruba.
Në një nga këto episode, flitet për një leje ndërtimi për një truall në rrugën Dervish Hima. Pjesë në këtë truall kishte edhe Denis Matoshi, i njohur gjerësisht si Eldi Dizdari. Pasi kishin bërë shumë manovra mes pronarëve nëpërmjet falsifikimeve, por edhe nëpërmjet akteve të dhurimit, sipas SPAK, nxjerrja e lejes së ndërtimit nuk u bë e mundur për shkak se sipërfaqja e truallit, që ishte në pronësi të Eldi Dizdarit, u sekuestrua nga SPAK në fund të vitit 2021.
Ndërkohë, në maj të vitit 2022, kjo pronë kërkohet të konfiskohet nga SPAK. Kjo solli edhe një shqetësim te grupi i personave që kërkonin të ndërtonin një kullë te Stadiumi në Tiranë. Madje, në hetimet e SPAK rezulton se grupi kriminal ka përdorur edhe Agjencinë Shtetërore të Kadastrës për të kërkuar informacione nëse SPAK po i hetonte. Kjo periudhë përkon edhe me operacionin “Shqiponja e Zezë”, të bërë nga Belgjika.
“Nga tërësia e veprimeve noteriale dhe komunikimeve të kryera rezulton se personat nën hetim Artur Shehu, Adrian Rama, Elton Memeti janë përfshirë në kryerje të veprimeve fillimisht për të zhvilluar pronën, më pas në veprime juridike të maskuara me dhurim, me qëllim që me lidhjet e tyre të mund të nxirrnin leje ndërtimi. Për këtë fakt, rezultuar të dhënave të dërguara nga autoritetet spanjolle dhe ato belge, personat nën hetim kanë kryer edhe takime me njëri-tjetrin jashtë shtetit, në Spanjë dhe në Aruba, ndërsa ata kanë komunikuar edhe në lidhje me takime me funksionarë të lartë shtetërorë. Nxjerrja e lejes së ndërtimit duket se është penguar nga sekuestrimi që është bërë për pjesën ideale që subjekti Denis Matoshi kishte përfituar me anë të dhurimit, kërkesë e cila ishte dërguar për konfiskim, si dhe fakti që nuk është arritur të revokohej kontrata e lidhur më parë, si dhe pavarësisht këtyre fakteve, grupi kriminal, nëpërmjet personit nën hetim Adrian Rama, ndjek veprimet e kryera edhe në kuadër të ndërtimit të Shkollës së Biçikletave dhe sipas komunikimeve që ai kryen, ai për zhvillimin e saj është në pritje të planeve të zhvillimit”, thuhet në dosje. /infonews.al
