Ministria për Evropën dhe Punët e Jashtme (MEPJ) ka njoftuar se vijon të jetë e hapur thirrja për plotësimin e 10 vendeve vakante në misionin e Shqipërisë pranë Bashkimit Evropian në Bruksel.
Sipas njoftimit zyrtar, aplikimet janë të mirëpritura nga nëpunës të Shërbimit të Jashtëm, punonjës të administratës publike, si edhe nga profesionistë shqiptarë, brenda dhe jashtë vendit, të cilët përmbushin kriteret e përcaktuara.
Pozicionet e shpallura përfshijnë role të ndryshme, si: zëvendësshef misioni me gradën ministër fuqiplotë; këshilltar për marrëdhëniet me Këshillin dhe DG ENEST; këshilltar për marrëdhëniet me Parlamentin Evropian; këshilltar për komunikimin; koordinator i dimensionit sektorial me gradë ministër këshilltar; këshilltar për shtetin e së drejtës; këshilltar për bujqësinë dhe zhvillimin rural; këshilltar për energjinë dhe industrinë; si dhe dy poste sekretari të parë për konvergjencën dhe zhvillimet makroekonomike, dhe për mjedisin dhe çështjet sociale.
Afati i fundit për dorëzimin e aplikimeve është 8 maji 2026. Kjo iniciativë synon të forcojë praninë dhe përfaqësimin e Shqipërisë në institucionet e Bashkimit Evropian, duke tërhequr profesionistë të kualifikuar që mund të kontribuojnë në procesin e integrimit evropian të vendit.
