Është hedhur këtë të martë shorti në Gjykatën e Posaçme kundër Korrupsionit dhe Krimit të Organizuar, ku është përcaktuar trupa gjykuese që do të shqyrtojë çështjen ndaj ish-Presidentit Ilir Meta dhe ish-deputetes Monika Kryemadhi.
Sipas shortit, trupa gjykuese do të përbëhet nga gjyqtarët Erjon Bani, Rudina Palloj dhe Marinela Osmani.
Ilir Meta dhe Monika Kryemadhi po hetohen nga Prokuroria e Posaçme për akuza që lidhen me korrupsionin, pastrimin e parave dhe mosdeklarimin e pasurisë.
Hetimi i SPAK ka përfshirë verifikime mbi transaksione financiare, deklarime pasurie, pagesa dhe shpenzime të dyshuara si të pajustifikuara me të ardhurat e deklaruara.
Nga ana tjetër, Meta dhe Kryemadhi i kanë mohuar akuzat, duke i konsideruar ato si të motivuara politikisht.
Me caktimin e trupës gjykuese, çështja hyn në një fazë tjetër procedurale në Gjykatën e Posaçme.
