Draftligji për “Agjencinë Shtetërore të Pronës”, që është në konsultim publik, përcakton rregulla të reja për regjistrimin e pronave në bashkëpronësi, si dhe për ndarjen dhe bashkimin e tyre.
Kur një pronë është në emër të disa personave dhe nuk përcaktohet se sa i takon secilit, pjesët do të konsiderohen të barabarta. Për pronat në bashkëpronësi në tërësi, pjesët përcaktohen kur prona ndahet, me marrëveshje noteriale ose vendim gjykate.
Dokumenti që bën ndarjen duhet të përcaktojë pjesën që i takon çdo bashkëpronari dhe pozicionin e saj në hartën kadastrale.
Projektligji parashikon gjithashtu që pronat ngjitur, nëse kanë të njëjtin pronar dhe të njëjtat të drejta e detyrime, mund të bashkohen në një pasuri të vetme.
Në rast se një pronar dëshiron të ndajë pronën e tij në dy ose më shumë pjesë, do të përgatitet një plan i ri rilevimi. Kartela e vjetër mbyllet, hapen kartela të reja dhe përditësohet harta kadastrale.
Pas procedurës, pronarët pajisen me certifikata të reja pronësie. Ndërkohë, ndarja e pronës nuk mund të përdoret për të ndryshuar apo fshirë të drejtat reale mbi të. /skyweb.al
