Ministria e Drejtësisë ka përcjellë pranë autoriteteve franceze kërkesën për ekstradimin e biznesmenit shqiptar Ermal Beqiri, i arrestuar më 24 korrik në Francë.
Sipas ministrisë, kërkesa është dërguar së bashku me dokumentacionin përkatës, në përputhje me legjislacionin shqiptar, marrëveshjet ndërkombëtare dhe procedurat e bashkëpunimit juridik mes Shqipërisë dhe Francës.
Beqiri u arrestua pasi avioni i vogël me të cilin udhëtonte hyri në lartësi të ulët në zonën e sigurisë mbi centralin bërthamor Penly. Pas uljes në aeroport, ai u ndalua nga autoritetet franceze, të cilat gjatë verifikimit të identitetit konstatuan se ishte shpallur në kërkim ndërkombëtar nga Interpoli.
SPAK ka bërë të ditur se kishte marrë më herët informacione për praninë e tij në Francë. Pas arrestimit, Prokuroria e Posaçme u kërkoi autoriteteve franceze edhe sekuestrimin e pasurive që dyshohet se Beqiri zotëron në këtë shtet.
Nga hetimet janë identifikuar një kështjellë e blerë për rreth 2.6 milionë euro, llogari bankare me një vlerë totale mbi 2 milionë euro, dy apartamente dhe disa automjete të përdorura prej tij.
Gjykata e Posaçme kishte vendosur ndaj Beqirit masën e sigurisë “arrest në burg” më 15 dhjetor 2025. Ai po hetohet nga SPAK në kuadër të dosjes për tenderët e AKSHI-t.
Sipas Prokurorisë së Posaçme, Beqiri dyshohet se ka qenë pjesë e një grupi të strukturuar kriminal, i cili manipulonte procedurat e prokurimeve publike dhe ushtronte presion ndaj operatorëve konkurrues.
Mediat franceze kanë raportuar se shqyrtimi i kërkesës për ekstradim dhe përfundimi i procedurave mund të zgjasin disa javë.
