Gjatë vitit 2024 burrat janë ankuar më shumë te Avokati i Popullit. Sipas të dhënave të INSTAT, burrat kanë paraqiutur dyfish të ankesave pranë institucionit, që lidhen më së shumti me të drejtën e fëmijës.
Nga gjithsej 1,614 ankesa, 62% (1,005 raste) janë bërë nga burra, ndërsa 30% (485 raste) nga gra. Rreth 8% (124 ankesa) janë dorëzuar nga grupe ose subjekte që përfaqësojnë të dy gjinitë.
Burrat ankohen më shumë për: Të drejtën e fëmijës – 237 raste (23.6%); Të drejtën e pronës – 190 raste (18.9%); Procesin e rregullt ligjor – 123 raste (12.2%)
Ndërsa gratë raportojnë më shumë për: Të drejtën e fëmijës – 195 raste (40.2%); Procesin e rregullt ligjor – 53 raste (10.9%); Të drejtën e pronës – 38 raste (7.8%).
Ekspertët theksojnë se ky ndryshim në nivelin e ankesave mund të lidhet me faktorë të ndryshëm socialë dhe ekonomikë. Gratë shpesh përballen me barriera më të mëdha në qasjen ndaj institucioneve publike, si mungesa e informacionit, e mbështetjes ligjore ose e besimit në institucionet shtetërore. /Skyweb.al
