Një sondazh i fundit i Audience Research për NATO-n ka konfirmuar mbështetjen e lartë të shqiptarëve për Aleancën, duke e konsideruar atë si garancinë kryesore për sigurinë kombëtare.
Sipas të dhënave, 91% e qytetarëve shqiptarë do të votonin për të qëndruar në NATO nëse do të mbahej një referendum. Ky është një nivel shumë më i lartë se mesatarja e vendeve anëtare, ku vetëm 68% do të votonin për qëndrim dhe 15% për largim.
63% e shqiptarëve mendojnë se NATO është “shumë e rëndësishme” për sigurinë e ardhshme të vendit, ndërsa 78%besojnë se anëtarësimi e bën më të pamundur një sulm të huaj ndaj Shqipërisë, një nga shifrat më të larta në Aleancë. Po ashtu, 67% e qytetarëve mbështesin mbrojtjen e një aleati të NATO-s nëse sulmohet, duke treguar përkushtim ndaj parimit të mbrojtjes kolektive.
Shqiptarët mbështesin fort edhe rritjen e kapaciteteve mbrojtëse të vendit: 69% janë pro shtimit të buxhetit të mbrojtjes (kundrejt 41% mesatarja e NATO-s), ndërsa 73% kërkojnë rritjen e prodhimit kombëtar të mbrojtjes për të forcuar gatishmërinë ushtarake. Vetëm një pakicë prej 11% shprehet kundër rritjes së shpenzimeve dhe 6% kundër rritjes së prodhimit kombëtar.
Sa i përket luftës në Ukrainë, 55% e shqiptarëve mbështesin vijimin e ndihmës për Kievin. Ndërkohë, shqetësimi për mundësinë e një lufte në vendet e NATO-s ka rënë, pasi vetëm 65% shprehen të shqetësuar – një rënie e ndjeshme krahasuar me periudhat e mëparshme.
Rezultatet tregojnë se shqiptarët mbeten ndër qytetarët më besnikë ndaj NATO-s, duke e parë Aleancën si një garanci të pazëvendësueshme për paqen dhe stabilitetin e vendit dhe të rajonit.
