Komisioni Parlamentar për Ekonominë, Punësimin dhe Financat miratoi nen për nen me 7 vota pro projektligjin për buxhetin e vitit 2026. Gjatë shqyrtimit, deputetët paraqitën një sërë amendamentesh që synojnë rritjen e fondeve në sektorët kryesorë të arsimit, pensioneve, bujqësisë dhe pagave në administratë.
Deputetja e Partisë Demokratike, Ina Zhupa propozoi shtim fondesh në arsim për dyfishimin e oficerëve të sigurisë në shkolla dhe dhënien e pagës së 13-të për mësuesit.
“Amandamenti i parë është për pagën e 13-të për të gjithë mësuesit, kërkesë e ardhur nga arsimi parauniversitar. I dyti lidhet me krijimin e fondit për dyfishimin e oficerëve të sigurisë, për shkak të ngjarjeve kriminale që po ndodhin në shkolla. Ndërsa amandamenti i tretë parashikon një fond kontigjence prej 2 miliardë lekësh për bashkitë e prekura në qarkun e Vlorës, 1.5 miliardë lekë për kompensime dhe 0.5 miliardë për rehabilitimin e infrastrukturës”, u shpreh Zhupa.
Deputeti i Partisë së Lirisë, Tedi Blushi prezantoi 12 amendamente, me theks te rritja e pensioneve, një kërkesë e artikuluar edhe nga deputetë të tjerë të opozitës, të cilët kërkuan trefishimin e fondit për pensionet ose shtesë prej 3.4 miliardë lekësh.
“Rritja prej 60 lekësh në ditë në qytet dhe 20 lekësh në fshat është e pamjaftueshme, sidomos kur pritet inflacion më i lartë vitin e ardhshëm. Kërkojmë shtesë fondesh për pensionet, bujqësinë, arsimin parauniversitar, të mesëm dhe universitar, me rritje prej 5 miliardë lekësh. Propozojmë gjithashtu 1 miliard lekë më shumë për sportin, 2 miliardë për shkencën dhe fonde shtesë për sigurinë ushqimore”, deklaroi Blushi.
Amendamentet e propozuara përfshijnë gjithashtu mosfinancimin e PPP-ve të konsideruara të dyshimta, katërfishimin e dëmshpërblimeve për ish të përndjekurit politikë, rritjen e mëtejshme të bonusit të bebes, rritjen e pagës minimale nga 40 mijë në 50 mijë lekë, si edhe shtesë prej 12 miliardë lekësh për administratën publike me qëllim garantimin e një rritjeje 10 për qind të pagave, fonde që parashikohet të sigurohen nga rialokimi i shpenzimeve operative të qeverisjes qendrore.
Në ditët në vijim, Komisioni pritet të përmbyllë diskutimet përfundimtare përpara se projektbuxheti të kalojë në seancë plenare. /skyweb.al
