Ekspertët presin që euro të vijojë dobësimin ndaj lekut gjatë vitit 2026, të nxitur kryesisht nga flukset e larta valutore që hyjnë në ekonomi.
Vlerësimet vijnë nga një vrojtim i fundit i specialistëve të tregut financiar, ku janë analizuar faktorët kryesorë që po ndikojnë kursin e këmbimit.
Sipas panelit të ekspertëve të referuar nga Monitor, ndikimin më të madh e ka turizmi dhe rritja e eksporteve të shërbimeve, të cilat janë vlerësuar me peshën më të lartë.
Të dhënat tregojnë se për nëntëmujorin e vitit 2025, të ardhurat neto nga turizmi arritën në rreth 2.1 miliardë euro, me një rritje gati 20 për qind në krahasim me një vit më parë.
Në të njëjtën periudhë, shërbimet gjeneruan afro 3.5 miliardë euro të ardhura neto, duke forcuar më tej ofertën e valutës në treg.
Faktori i dytë më i rëndësishëm mbeten remitancat. Dërgesat e emigrantëve arritën në rreth 817 milionë euro për nëntë muaj, në rritje vjetore, duke ushqyer hyrjen e vazhdueshme të euros në ekonomi dhe duke mbështetur forcimin e lekut.
Ekspertët rendisin gjithashtu ndër faktorët me ndikim prurjet informale të valutës, investimet e huaja në pasuri të paluajtshme dhe bilancin tregtar.
Investimet e huaja në sektorin e pronave vazhdojnë të dominojnë, duke arritur mbi 400 milionë euro për nëntëmujorin dhe duke përfaqësuar një pjesë gjithnjë e më të madhe të investimeve totale në vend.
Në tërësi, kombinimi i turizmit në rritje, remitancave, investimeve të huaja dhe flukseve të tjera valutore po krijon një ofertë të lartë eurosh në treg, çka sipas ekspertëve pritet të mbajë kursin nën presion edhe gjatë vitit 2026. /skyweb.al
