Shteti ka ndërhyrë në Aeroportin e Vlorës pas përshkallëzimit të konfliktit mes dy aksionerëve të projektit, Behgjet Pacollit dhe Valon Ademit, ndërsa forca të shumta policie kanë marrë nën kontroll hyrjen dhe ambientet e kantierit për të shmangur përplasje të tjera.
Mëngjesin e sotëm, policia është vendosur në aeroportin e Vlorës pas tensioneve të forta të regjistruara mes kompanisë “Mabco” të Behgjet Pacollit dhe “2A Group” të Valon Ademit, dy ortakët e projektit të Aeroportit Ndërkombëtar të Vlorës.
Sherri te Aeroporti i Vlorës, MABCO: Po nxjerrin nga VIA pasi mbaruan punimet
Konflikti mes palëve, që tashmë është zhvendosur edhe në gjykatë, shpërtheu sërish një ditë më parë, kur punonjësit e “2A Group” nuk lejuan hyrjen në kantier të 22 nënkontraktorëve të thirrur nga kompania e Pacollit për të vijuar punimet në aeroport.
Pas kësaj, situata u tensionua edhe më shumë, pasi pala tjetër bllokoi hyrjen kryesore të kantierit duke mos lejuar daljen e automjeteve të “2A Group”.
Për shkak të frikës për përplasje fizike dhe agravim të situatës, policia ka shtuar ndjeshëm praninë në zonë dhe po mban nën kontroll hyrjet dhe godinat e aeroportit.
Burime nga zona bëjnë me dije se gjatë ditës priten grumbullime dhe reagime nga të dyja palët, ndërsa tensionet mbeten të larta.
Përplasja mes ortakëve po ndikon drejtpërdrejt edhe në ecurinë e një prej projekteve strategjike më të rëndësishme për jugun e vendit, në një kohë kur aeroporti i Vlorës konsiderohet kyç për zhvillimin e turizmit dhe transportit ajror në zonë.
Mbetet për t’u parë nëse autoritetet shqiptare do të ndërhyjnë jo vetëm për ruajtjen e rendit, por edhe për zgjidhjen e konfliktit në favor të interesit publik, duke shuar përplasjen mes palëve, zhbllokuar aeroportin dhe përshpejtuar futjen e tij në funksionim përmes një kontrolli më të fortë nga shteti shqiptar dhe jo nga biznesmenët në konflikt. /skyweb.al
