Shoqëria koncesionare “Vlora International Airport – VIA” sh.p.k., tashmë nën kontrollin e Valon Ademit pas vendimit të gjykatës për ngrirjen e aksioneve të biznesmenit Behgjet Pacolli, ka reaguar lidhur me situatën e krijuar sot në hyrje të kantierit të Aeroportit Ndërkombëtar të Vlorës.
Në reagimin zyrtar, VIA thekson se nuk bëhet fjalë për një konflikt politik apo për një “bllokim të aeroportit”, siç sipas saj është tentuar të paraqitet publikisht, por për një çështje të qartë kontraktuale me shoqërinë MABCO Constructions S.A.
Sipas VIA, problemi lidhet me vonesa të konsiderueshme në realizimin e punimeve, mospërmbushje të detyrimeve kontraktuale dhe shkelje të afateve të përcaktuara në kontratë.
Shoqëria koncesionare deklaron se deri më 08 prill 2026 janë evidentuar 429 ditë vonesë në punime, ndërsa dëmvonesat e përllogaritura arrijnë në 4.290.000 euro. Sipas saj, kjo shumë vijon të rritet deri në pranimin provizor të punimeve.
Në reagim sqarohet gjithashtu se procedurat e hyrjes në kantier janë standarde sigurie dhe zbatohen për të gjithë pa përjashtim.
“Procedurat kanë për qëllim mbrojtjen e kantierit, sigurinë e personelit, kontrollin e hyrje-daljeve dhe parandalimin e hyrjes së personave të paautorizuar. Asnjë subjekt nuk mund të hyjë në kantier pa respektuar autorizimet dhe procedurat përkatëse”, thuhet në deklaratë.
VIA thekson se Aeroporti Ndërkombëtar i Vlorës është një projekt strategjik kombëtar dhe nuk mund të mbahet peng nga vonesat, presioni publik apo taktikat që, sipas saj, synojnë të zhvendosin debatin nga dokumentacioni kontraktual tek tensionet në hyrje të kantierit.
Shoqëria deklaron se mbetet e angazhuar për vijimin e punimeve, mbrojtjen e interesit publik, respektimin e standardeve teknike dhe përfundimin e projektit sipas detyrimeve kontraktuale dhe institucionale.
Në fund të reagimit, VIA i bën thirrje MABCO Constructions që çdo pretendim të trajtohet vetëm në rrugë ligjore dhe kontraktuale, duke shmangur, sipas saj, çdo përpjekje për tensionim të situatës në hyrje të kantierit apo përdorim të punonjësve dhe nënkontraktorëve për presion publik. /skyweb.al
