Liria e medias në Shqipëri vijon të përballet me sfida serioze që lidhen me sigurinë e gazetarëve, presionet ekonomike dhe intimidimin online. Ky ishte mesazhi kryesor i përfaqësuesve të OSBE-së gjatë Konferencës për Median në Evropën Juglindore, e zhvilluar në Tiranë.
Në konferencë morën pjesë përfaqësues të OSBE-së, Ministri për Europën dhe Punët e Jashtme Ferit Hoxha, si dhe gazetarë dhe përfaqësues mediash nga Shqipëria dhe rajoni.
Kryetari i Prezencës së OSBE-së në Shqipëri, ambasadori Michel Tarran, deklaroi se sfidat ndaj lirisë së medias në vend kërkojnë vëmendje të vazhdueshme.
“Sfidat ndaj lirisë së medias në Shqipëri mbeten dhe kërkojnë vëmendje të vazhdueshme. Këto përfshijnë shqetësime që lidhen me sigurinë e gazetarëve, presionet ekonomike që ndikojnë në qëndrueshmërinë e mediave të pavarura, si dhe intimidimin dhe fushatat denigruese në internet”, deklaroi Tarran.
Në konferencë ishte i pranishëm edhe përfaqësuesi i OSBE-së për Lirinë e Medias, Jan Braathu, i cili theksoi se gazetarët po përballen me rritje të kërcënimeve dhe se siguria e tyre është kusht për ekzistencën e medias së lirë.
“Vetë gazetarët po përballen me rritje të kërcënimeve. Liria e medias është themeli i demokracisë. Gazetaria si e mirë publike është thelbësore. Pa siguri nuk ka gazetarë të lirë, nuk ka media të lirë. Kërcënimet ndaj gazetarëve nuk duhet të kalojnë pa u ndëshkuar”, u shpreh Braathu.
Nga ana tjetër, ambasadori Tarran theksoi rëndësinë e forcimit të pavarësisë editoriale dhe mbrojtjes ligjore për gazetarët.
Sipas tij, nevojiten më shumë përpjekje për të rritur transparencën në media, për të garantuar zbatimin e mbrojtjeve ligjore dhe për të krijuar kushte që gazetarët të ushtrojnë profesionin sipas standardeve më të larta etike dhe profesionale.
“Nevojiten përpjekje të mëtejshme për të forcuar transparencën, pavarësinë editoriale dhe zbatimin e qëndrueshëm të mbrojtjeve ligjore, duke mbështetur njëkohësisht kushte që u mundësojnë gazetarëve të respektojnë standardet më të larta profesionale, etike dhe të raportimit të paanshëm”, deklaroi ai.
Duke folur konkretisht për Shqipërinë, ambasadori Tarran përmendi edhe disa zhvillime pozitive, përfshirë krijimin e një pike kontakti në Drejtorinë e Përgjithshme të Policisë së Shtetit për trajtimin e rasteve që lidhen me sigurinë e gazetarëve.
Sipas tij, ky mekanizëm, së bashku me disa ndryshime ligjore, përfaqëson një hap të rëndësishëm drejt forcimit të mbrojtjes së profesionistëve të medias.
“Drejtoria e Përgjithshme e Policisë së Shtetit ka krijuar një pikë kontakti për sigurinë e gazetarëve, e cila, së bashku me disa ndryshime ligjore, përfaqëson një hap të rëndësishëm drejt forcimit të mbrojtjes së profesionistëve të medias”, theksoi Michel Tarran.
