Muaji gusht, që përmbylli sezonin veror, ka sjellë një tjetër rekord për turizmin shqiptar. Sipas të dhënave më të fundit të INSTAT, numri i vizitorëve gjithsej u rrit me 35.1 për qind krahasuar me të njëjtin muaj të vitit të kaluar, duke reflektuar një bum të vërtetë në interesin për Shqipërinë si destinacion turistik.
Në këtë rritje, vizitorët e huaj jo-rezidentë kanë luajtur rolin kryesor me një zgjerim prej 40.6 për qind, ndërsa turistët vendas janë shtuar me 21.6 për qind. Edhe qëndrimet e regjistruara në struktura akomoduese janë rritur ndjeshëm me 33.3 për qind, ku qëndrimet e të huajve u rritën me 42.6 për qind, kundrejt 11.7 për qind nga vizitorët shqiptarë.
Rritja më e madhe e vizitorëve të huaj është regjistruar në zonat bregdetare, me një shtim prej 47.8 për qind, ndërsa hotelet dhe njësitë e ngjashme kanë pasur një rritje të numrit të pushuesve me 35.2 për qind.
Nga ana tjetër, rajoni qendror vijon të mbetet destinacioni më i frekuentuar nga turistët e huaj, me rreth 238 mijë vizitorë të huaj dhe 48 mijë vendas gjatë gushtit. Ndërkohë, zonat bregdetare kanë pritur prurjet më të mëdha të pushuesve vendas, me rreth 121 mijë turistë, duke e konfirmuar rivierën shqiptare si epiqendrën e turizmit veror.
Sipas INSTAT, Kosova vijon të mbetet tregu më i madh turistik për Shqipërinë, duke përfaqësuar 21 për qind të vizitorëve të huaj, e ndjekur nga Polonia me 12 për qind dhe Italia me 10 për qind. Ndërkohë, Franca dhe Gjermania përbëjnë nga 7 për qind secila, ndërsa 43 për qind e turistëve vijnë nga vende të tjera, çka tregon për një diversifikim të dukshëm të tregjeve turistike.
Një tjetër tregues pozitiv është norma e shfrytëzimit të dhomave, e cila arriti në 61.5 për qind, nga 59.6 për qind që ishte në gushtin e vitit 2024. Kjo shifër konfirmon një sezon turistik më të suksesshëm, me kërkesë më të lartë për akomodim dhe me një performancë gjithnjë e më të qëndrueshme të sektorit të turizmit shqiptar.
