Ndërsa vendimi për datën e zgjedhjeve në Bashkinë e Tiranës mbetet ende pezull, kandidati i pavarur Florian Binaj ka publikuar një video-mesazh drejtuar qytetarëve të kryeqytetit.
Në mesazhin e tij, Binaj u bën thirrje qytetarëve që të mendojnë për të ardhmen e fëmijëve të tyre kur të shkojnë në votime, duke theksuar se Tirana ndodhet përballë dy rrugëve: “betonit dhe korrupsionit”, ose “një bashkie të ndershme në shërbim të qytetarëve”.
“Mundësia për t’u shërbyer juve është nderi më i madh i jetës sime. Tirana nuk është vetëm qyteti ku ne jetojmë, është shtëpia që do t’ua lëmë fëmijëve tanë. Ndaj kur të votojmë, të mendojmë për ta. Kemi dy rrugë përballë: të vazhdojmë me korrupsionin, betonin dhe administratën me patronazhistë, ose të zgjedhim ndryshimin, një bashki me njerëz të ndershëm e profesionistë që u shërbejnë qytetarëve”, – shprehet Binaj në video.
Në fund të mesazhit, kandidati i pavarur i fton qytetarët që t’i shkruajnë drejtpërdrejt për shqetësimet dhe idetë e tyre, duke theksuar se ndryshimi vjen vetëm përmes përfshirjes dhe bashkëpunimit të qytetarëve.
“Ju ftoj të bëhemi bashkë për ndryshimin. Më shkruani shqetësimet, mendimet edhe historitë tuaja. Së bashku mund ta ndryshojmë Tiranën”, përfundon Binaj në videon e shpërndarë në rrjetet sociale. /skyweb.al
