Teksa hynte në Kuvend dy ditë më parë, Elisa Spiropali deklaroi se mazhoranca duhet të reflektojë dhe të dëgjojë qytetarët, ndërsa më herët kishte folur edhe për nevojën e një “vetëpastrimi” brenda forcës qeverisëse.
Ndërkohë dje pasdite, fillimisht në Whats App-in e deputetëve të PS dhe më pas në mediat online nisën të qarkullonin fotografi ku Spiropali shfaqet në një takim me Indrit Aliun, i njohur edhe si Indrit Kolleshi.
Sipas raportimeve mediatike, Indrit Aliu rezulton të jetë arrestuar dhe dënuar të paktën dy herë për mashtrim në shuma të mëdha.
Ai u prezantohej biznesmenëve si punonjës i një ministrie duke u premtuar ndërhyrje për përfitimin e tenderëve në këmbim të shumave të konsiderueshme të parave.
Dënimet e tij janë ekzekutuar dhe aktualisht ai është një qytetar i lirë. Tashmë Indrit Aliu është një qytetar i lirë pasi ka shlyer dënimet me burg për mashtrim dhe mund të pijë kafe me kë të dojë pa patur nevojë të japë asnjë shpjegim.
Në fakt, çështja që ngre debat nuk lidhet me Indrit Aliun, por me takimin e një deputeteje dhe ish-ministreje me një personazh si ai.
Nëse bëhet fjalë për një takim rastësor, miqësor apo për një tjetër arsye, është vetë Elisa Spiropali ajo që mund të sqarojë opinionin publik.
Aq më tepër kur vetë ajo ka folur publikisht për nevojën që mazhoranca të “vetëpastrohet”.
Për këtë arsye, pritshmëritë për transparencë bien mbi zyrtaren publike dhe jo mbi Indrit Aliun.
Një sqarim nga Elisa Spiropali do të ndihmonte në shmangien e çdo keqinterpretimi mbi natyrën e këtij takimi dhe raportin e saj me këtë personazh. /skyweb.al
