Rënia e lindshmërisë në shumë vende të botës po lidhet gjithnjë e më shpesh me ndikimin e rrjeteve sociale dhe përdorimin masiv të telefonave inteligjentë, ndërsa disa analistë argumentojnë se platforma si TikTok po ndryshojnë mënyrën se si të rinjtë socializohen, krijojnë marrëdhënie dhe ndërtojnë familje.
Në një analizë të publikuar nga revista britanike The Spectator, ish-deputetja konservatore britanike Miriam Cates argumenton se përdorimi i tepruar i rrjeteve sociale po ndikon jo vetëm në përqendrimin dhe shëndetin mendor të të rinjve, por edhe në marrëdhëniet romantike dhe dëshirën për të krijuar familje.
Sipas artikullit, që nga përhapja globale e smartfonëve dhe mediave sociale, normat e fertilitetit kanë rënë ndjeshëm në shumë vende. Sipas analizave të demografit John Burn-Murdoch, ulja e lindshmërisë është përshpejtuar paralelisht me përdorimin masiv të telefonave inteligjentë.
Analiza ngre shqetësimin se të rinjtë po kalojnë më pak kohë në ndërveprime reale sociale, ndërsa komunikimi virtual dhe konsumimi i pafund i përmbajtjeve online po zëvendëson takimet, lidhjet romantike dhe jetën sociale tradicionale. “Është më e lehtë të bësh scrolling sesa të krijosh marrëdhënie reale”, argumentohet në artikull.
Debati është rindezur edhe për shkak të shqetësimeve mbi ndikimin e TikTok dhe platformave të tjera tek adoleshentët. Në disa vende, përfshirë Australia, janë vendosur ose po diskutohen kufizime për përdorimin e rrjeteve sociale nga të miturit.
Megjithatë, ekspertët theksojnë se rënia e fertilitetit është një fenomen kompleks që lidhet edhe me faktorë ekonomikë, pasigurinë financiare, koston e jetesës, ndryshimet kulturore dhe shtyrjen e martesës apo prindërimit në moshë më të madhe.
Debati mbi ndikimin e teknologjisë në jetën sociale dhe demografinë globale pritet të vazhdojë, ndërsa përdorimi i rrjeteve sociale mbetet në rritje, sidomos tek brezat e rinj. /skyweb.al
