Dy tenderët e fundit për shërbime printimi, në Ministrinë e Arsimit dhe Sporteve dhe në Postën Shqiptare, kanë përfunduar sërish në Komisionin e Prokurimit Publik (KPP), duke vijuar një model të përsëritur të kompanisë Infosoft , në pronësi të biznesmenit Grigor Joti .
Një vëzhgim i Skyweb.al tregon se praktikisht thuajse çdo procedurë publike që lidhet me pajisje printimi, furnizime me tonera, skanera apo blerje letre ku Infosoft planifikon të marrë pjesë, shoqërohet me ankesa të menjëhershme pranë KPP-së nga InfoSoft.
Në çdo rast, kompania pretendon se kushtet e tenderit janë formuluar në mënyrë që cenojnë konkurrencën e ndershme dhe favorizojnë operatorë të caktuar.
Në tenderin e Drejtorisë së Taksave dhe Tarifave të Bashkisë së Tiranës, me vlerë rreth 100 mijë euro, Infosoft ka kundërshtuar faktin që është bashkuar në një të vetme mirëmbajtja e pajisjeve ekzistuese me furnizimin e pajisjeve të reja, duke kërkuar ndarjen e procedurës në dy lote të veçanta.
Po ashtu, kompania kundërshton detyrimin për përdorimin ekskluziv të pjesëve origjinale të prodhuesve Ricoh dhe Xerox, si dhe kërkesën për certifikata specifike të lëshuara nga vetë prodhuesit për personelin teknik. Sipas Infosoft, këto kushte reduktojnë artificialisht numrin e operatorëve që mund të kualifikohen dhe orientojnë garën drejt operatorëve të lidhur ngushtë me markat në fjalë.
Një skemë e ngjashme ankimimi është ndjekur edhe në tenderin e Postës Shqiptare për furnizimin me tonera, me fond limit rreth 30 milionë lekë.
Infosoft kërkon heqjen e disa kritereve teknike, si specifikimet për paketimin hermetik, kërkesat për të dhëna fiziko-kimike mbi ambalazhet dhe detyrimin për certifikata origjine të lëshuara nga vetë prodhuesit në momentin e dorëzimit të mallit.
Kompania kërkon gjithashtu që të lejohet pjesëmarrja me produkte “ose ekuivalente”, duke e konsideruar listën aktuale të markave si pengesë për konkurrencën.
Përplasja e dyfishtë me tatimet
Por përplasjet e Infosoft me autoritetet publike nuk janë të reja. Një ndër rastet më të bujshme mbetet përplasja me Drejtorinë e Përgjithshme të Tatimeve për tenderin e furnizimit me pajisje printerash, e cila u përshkallëzua edhe gjatë vitit 2023. Edhe atëherë, Infosoft akuzoi tatimet për favorizim të kompanisë “Kallfa” SHPK, që u shpall fituese me ofertën më të ulët.
Pas ankesës, KPP konstatoi shkelje serioze në vlerësim dhe urdhëroi anullimin e procedurës, por pa e shpallur fitues Infosoft, duke rikthyer procedurën nga e para.
Modeli i përsëritur i Infosoft për të sfiduar çdo tender ku merr pjesë, përmes ankesave të vazhdueshme në KPP, ka ngritur ndër vite pikëpyetje mbi mënyrën si ndërtohen kriteret teknike nga autoritetet publike, por edhe mbi strategjinë e kompanisë për të tentuar të ndalë çdo garë që mund të mos i favorizojë drejtpërdrejt interesat e saj. /skyweb.al
