Kompania Herzog & de Meuron Basel Ltd është shpallur fituese e konkursit ndërkombëtar për transformimin e Pallatit të Kongreseve në Tiranë.
Pesë studio prestigjioze arkitekturore finaliste prezantuan vizionet e tyre për rikualifikimin e godinës, ndërsa projekti fitues u vlerësua për qasjen e tij konservuese ndaj ndërtesës ekzistuese, duke respektuar vlerat historike dhe identitetin arkitektonik që ajo përfaqëson.
Gjatë ceremonisë së shpalljes së fituesit, kryeministri Edi Rama theksoi se objekti ka nevojë për një transformim të thellë, por pa humbur karakterin e tij origjinal. Sipas tij, projekti synon modernizimin e plotë të Pallatit të Kongreseve, duke përmirësuar teknologjinë, cilësinë e hapësirave dhe organizimin funksional të godinës.
Rama nënvizoi gjithashtu se synimi është që Pallati i Kongreseve dhe zona përreth të shndërrohen në një destinacion të ri turistik dhe kulturor për kryeqytetin, duke krijuar aktivitet dhe jetë urbane të përhershme, jo vetëm gjatë zhvillimit të eventeve. Ai e krahasoi këtë vizion me transformimin e zonës së ish-stadiumit, e cila sot është kthyer në një nga qendrat më aktive të jetës sociale në Tiranë.
“Është koha vërtetë për një transformim duke ruajtur identitetin e saj dhe natyrisht thirrja në bashkëpunim e sipërmarrjes, nënkupton dhe zhvillimin e një objekti apo një tërësie objektesh, do ta shohim nga propozimet, pranë Pallatit të Kongreseve dhe qëllimi përfundimtar është që ky pallat të vijë në kohë nga pikëpamja e teknologjisë, nga pikëpamja e cilësisë së hapësirave, nga pikëpamja e gjithë strukturës së riorganizuar dhe të riangazhuar cilësisht, por edhe që ky pallat dhe kjo zonë, të bëhet një destinacion tjetër i Tiranës turistike, i Tiranës kryeqytet i shqiptarëve i Tiranës së aktiviteteve kulturore dhe i Tiranës se aktivitetit të përditshëm social, duke mos e lënë një ishull që është gjithmonë një “ishull i heshtur” kur nuk ka një aktivitet brenda, duke krijuar dhe këtu jetë siç kemi krijuar dikur rreth gropës së dikurshme të stadiumit, që sot është një pol tjetër i jetës së përditshme dhe të përnatshme këtu”, tha Rama.
Nga ana tjetër, ministrja e Kulturës, Blendi Gonxhja, vlerësoi nevojën për një qendër multifunksionale, moderne dhe të denjë për Tiranën dhe Shqipërinë e sotme. Sipas tij, vendit i nevojitet një infrastrukturë bashkëkohore që të jetë në gjendje të presë aktivitete prestigjioze ndërkombëtare, artistë të njohur, samite, ekspozita dhe ngjarje të tjera të nivelit të lartë.
Rikualifikimi i Pallatit të Kongreseve konsiderohet një investim strategjik për jetën kulturore, institucionale dhe publike të vendit. Sipas qeverisë, ndërhyrja bëhet e domosdoshme për shkak të kapaciteteve të kufizuara të godinës aktuale dhe problematikave të shumta infrastrukturore që kërkojnë zgjidhje afatgjata.
