Agjencia për Media dhe Informim ka publikuar vendimet e miratuara në mbledhjen e sotme të Këshillit të Ministrave, të zhvilluar më 25 shtator 2026.
Në mbledhje, qeveria miratoi një sërë vendimesh, mes tyre edhe disa ndryshime në drejtimin e institucioneve shtetërore.
Një prej vendimeve lidhet me fshatin Vuno, i cili është shpallur “Pasuri Kulturore e Paluajtshme – Qendër Historike”. Vendimi përcakton gjithashtu zonën mbrojtëse, si dhe miraton planin për ruajtjen, mbrojtjen dhe administrimin e saj.
Këshilli i Ministrave miratoi në parim edhe marrëveshjen e financimit ndërmjet qeverisë shqiptare, të përfaqësuar nga Ministria e Ekonomisë dhe Inovacionit, në cilësinë e financuesit, dhe Programit të Kombeve të Bashkuara për Zhvillim (UNDP).
Në mbledhje u miratua gjithashtu dhënia e mendimit Kuvendit të Shqipërisë për projektligjin joqeveritar “Për ndarjen administrativo-territoriale të njësive të qeverisjes vendore në Republikën e Shqipërisë”.
Qeveria vendosi edhe rishpërndarjen e fondeve në buxhetin e miratuar për vitin 2026, ndërmjet Ministrisë së Ekonomisë dhe Inovacionit dhe Inspektoratit të Përgjithshëm.
Një tjetër vendim lidhet me propozimin e projektligjit “Për pranimin e ndryshimeve të përshtatura më 30 maj 2025 të Memorandumit të Mirëkuptimit të Parisit për Kontrollin Shtetëror Portual”, të bërë në Paris më 26 janar 1982 dhe të aderuar nga Shqipëria me ligjin nr. 9852, datë 26 dhjetor 2007.
Në mbledhjen e sotme u miratuan edhe disa ndryshime në drejtimin e institucioneve shtetërore.
Emiliano Gjika është liruar nga detyra e kryetarit të Agjencisë së Trajtimit të Koncesioneve.
Në këtë detyrë është emëruar Ina Zeqaj.
Ndërkohë, Oltjon Muzaka është liruar nga detyra e zëvendësministrit të Shëndetësisë dhe Mirëqenies Sociale dhe është emëruar zëvendësministër i Punëve të Brendshme.
